Son illərdə sosial iş sahəsinə olan maraq artıb. Cəmiyyətin həssas qrupları ilə işləyən, insanların sosial problemlərinin həllinə dəstək göstərən peşə sahiblərinə ehtiyacın çoxalması gənclərin bu istiqamətə yönəlməsinə səbəb olur.
Bakı Biznes Universitetinin Sosial iş fakültəsində təhsil alan Sehri İbrahimova mövzu ilə bağlı “Tehsil365”ə öz fikirlərini bölüşüb.
O bildirib ki, bu ixtisası seçməsi təsadüfi olmayıb:
“Hər zaman insanların sosial problemlərini görmək, ehtiyacı olanlara yardım etmək mənim üçün xüsusi bir dəyər olub.”
Sehri deyir ki, sosial iş geniş və məsuliyyətli sahədir və bu fakültədə tələbələr təkcə nəzəri bilik deyil, həm də insanlarla düzgün ünsiyyət qurmaq, onları anlamaq və vəziyyəti qiymətləndirmək bacarıqları əldə edirlər. Onun sözlərinə görə, universitetdə keçilən dərslər və müəllimlərin təcrübəsi bu sahəyə marağı daha da artırır.
O, təhsil aldığı müddətdə sosial xidmətlərin təşkili, ailələrlə iş, reabilitasiya, icma işi və sosial siyasət kimi mövzuların gələcək fəaliyyət üçün möhkəm baza yaratdığını vurğulayıb.
Sehri İbrahimova sosial işin mahiyyətini belə izah edib:
“Bu sahə mənim üçün insanlara təsir etmək, onların həyatında dəyişikliyə səbəb olmaq və cəmiyyətdə müsbət iz qoymaq deməkdir.”
O gələcəkdə sosial xidmət mərkəzlərində, QHT-lərdə və dövlət qurumlarında çalışaraq müxtəlif yaş qruplarına dəstək göstərməyi planlaşdırdığını bildirib. Xüsusilə uşaqlar, qadınlar, yaşlılar və əlilliyi olan şəxslərlə işləmək istədiyini qeyd edib.
Sehri əlavə edib ki, sosial iş fakültəsi ona peşə ilə yanaşı, həyatda empatiya, səbir və anlayış kimi vacib dəyərləri də qazandırır. Seçdiyi ixtisasın düzgün qərar olduğunu hər gün daha çox hiss etdiyini deyib.
Müsahibənin sonunda o, bu sahəni seçmək istəyən gənclərə belə məsləhət verib:
“Sosial iş ürəkdən sevilməsi lazım olan bir sahədir. İnsanlara kömək etməyi sevirsinizsə, səbirli və empatiyalısınızsa, bu ixtisas sizin üçün doğru seçim ola bilər.”