ABŞ Ədliyyə Departamenti (DOJ), sənədsiz immiqrant tələbələrə Kaliforniya ştatının dövlət kolleclərində dövlətdaxili təhsil haqqı və dövlət təqaüdləri təqdim etməsi ilə bağlı Kaliforniyaya qarşı məhkəmə iddiası qaldırıb.
"Tehsil365" xəbər verir ki, Cümə axşamı Şərq Dairə Məhkəməsinə təqdim edilən iddiada DOJ, bu qanunların ABŞ vətəndaşlarına verilməyən imtiyazları sənədsiz tələbələrə verdiyini iddia edərək, onların ABŞ Konstitusiyasına zidd olduğunu bildirib. Federal hökumət Kaliforniya qanunlarının ləğv olunmasını tələb edir.
İddiada Kaliforniya qubernatoru Gavin Newsom, həmçinin Kaliforniya Universiteti, Kaliforniya Dövlət Universiteti və Kaliforniya İcma Kollecləri sistemlərinin rəhbər orqanları da cavabdeh qismində göstərilib.
Bu, DOJ tərəfindən bu cür siyasətə malik ştatlara qarşı açılmış altıncı belə iddiadır. Məsələ, ABŞ-da immiqrasiya və təhsilə çıxışla bağlı qızğın müzakirələrin fonunda geniş ictimai rezonans doğurub.