Yeni Azərbaycan Partiyası Şabran rayon şöbəsinin təşkilatçılığı ilə Yeni Azərbaycan Partiyasının yaradılmasının 33-cü öldönümünə həsr olunmuş "33 il - Tərəqqi və Zəfər" adlı konfrans keçirilib.
“Tehsil365” xəbər verir ki, Şabran rayonu Heydər Əliyev Mərkəzində baş tutan tədbirdə Şabran Rayon İcra Hakimiyyətinin başçısı Asif Hüseynov, YAP Şabran rayon təşkilatının sədri Mehdi Balabəyov, Ərazi Partiya Təşkilatının sədrləri, partiya fəalları, rayonun idarə, təşkilat və müəssisə rəhbərləri iştirak ediblər.
Tədbir çərçivəsində ilk olaraq Şabran rayonu Heydər Əliyev Mərkəzində yerləşən ümummilli lider Heydər Əliyevin büstü qarşısına tər-gül dəstələri düzülüb və əziz xatirəsi dərin ehtiramla yad edilib.
Tədbirin rəsmi hissəsində Azərbaycan Respublikasının Dövlət Himni səsləndirilib, ulu öndər Heydər Əliyevin və şəhidlərimizin əziz xatirəsinin bir dəqiqəlik sükutla yad edilib.
Tədbirdə çıxış edən Şabran rayon İcra Hakimiyyətinin başçısı Asif Hüseynov və YAP Şabran rayon təşkilatının sədri Mehdi Balabəyov qeyd ediblər ki, Azərbaycan xalqının çoxəsrlik dövlətçilik tarixi göstərir ki, hər bir milli yüksəliş, hər bir tarixi dönüş xalqın iradəsi və uzaqgörən liderin müdrik rəhbərliyi ilə mümkündür. XX əsrin sonlarında, müstəqilliyini yenicə bərpa edib, lakin daxili çətinliklər, siyasi böhran və separatizm təhlükəsi ilə üzləşən Azərbaycana məhz belə bir lider və siyasi qüvvə lazım idi. Bu zərurətdən doğan hadisə - 1992-ci il 21 noyabrda Yeni Azərbaycan Partiyasının yaranması müasir tariximizin ən mühüm siyasi mərhələlərindən biridir. O dövrdə xalqın taleyi, dövlətin gələcəyi sual altında idi. Məhz bu şəraitdə xalqın istəyi ilə formalaşan Yeni Azərbaycan Partiyası (YAP) milli birliyin, dövlətçiliyin və sabitliyin bərqərar olmasında əsas rol oynadı.
Ulu öndər Heydər Əliyev deyirdi ki, Yeni Azərbaycan Partiyası xalqın partiyasıdır, gələcəyin partiyasıdır, Azərbaycanın tərəqqisi və sabitliyi bu partiyanın fəaliyyətindən asılı olacaq. Bu fikirlər zamanla tam təsdiqini tapdı. 2003-cü ildə ümummilli liderin siyasi kursunun layiqli davamçısı, Yeni Azərbaycan Partiyasının sədri İlham Əliyev Prezident seçildikdən sonra partiyanın fəaliyyəti yeni mərhələyə qədəm qoydu. Prezident İlham Əliyev YAP-ın ideoloji əsaslarını müasir çağırışlara uyğun şəkildə inkişaf etdirdi.
Bu gün, partiyanın yaranmasının 33-cü ildönümünü qeyd edərkən aydın görürük ki, Yeni Azərbaycan Partiyası təkcə bir siyasi təşkilat deyil, Azərbaycan dövlətçiliyinin ideoloji sütunu, sabitliyin təminatçısı və inkişafın lokomotividir. Yeni Azərbaycan Partiyası qısa müddətdə xalqın etimadını qazanaraq, ölkədə siyasi sabitliyin və inkişafın əsas qüvvəsinə çevrildi. Ulu öndər Heydər Əliyev Yeni Azərbaycan Partiyasının yaranması ilə ölkədə milli ideoloji dirçəlişin əsasını qoydu. Onun rəhbərliyi ilə partiya cəmiyyətin bütün təbəqələrini bir araya gətirərək milli birliyi təmin etdi.
Bu gün ulu öndər Heydər Əliyevin siyasi xəttini uğurla və ardıcıl davam etdirən dövlət başçısı, Yeni Azərbaycan Partiyasının sədri cənab İlham Əliyevin qeyd etdiyi kimi, "Yeni Azərbaycan Partiyası Azərbaycanın aparıcı siyasi qüvvəsidir, Cənubi Qafqazın ən böyük partiyasıdır". Sözün əsl mənasında, Yeni Azərbaycan Partiyası ümumxalq partiyasıdır və bu gün 33 illik uğurlu siyasi fəaliyyətimizin qələbəsini təntənə ilə qeyd edirik.
Qeyd olunub ki, Azərbaycan milli tərəqqinin yeni mərhələsinə qədəm qoyub. Prezident, Ali Baş Komandan İlham Əliyevin rəhbərliyi ilə 44 günlük Vətən müharibəsində möhtəşəm qələbənin qazanılmasından, ölkəmizin ərazi bütövlüyünün və tarixi ədalətin bərpasından sonra Azərbaycanın qarşısında yeni çağırışlar meydana çıxıb. Yeni dövrün reallıqlarına uyğun olaraq siyasi inkişafa xidmət edən islahatların aparılması, sosial-iqtisadi yüksəlişin davamlılığının təmin olunması, milli həmrəyliyin, Azərbaycanın beynəlxalq arenada və qlobal informasiya müstəvisində mövqeyinin daha da gücləndirilməsi, Böyük Qayıdışın yüksək səviyyədə həyata keçirilməsi, tarixi Qələbənin nəticələrinin möhkəmləndirilməsi və digər milli məqsədlər strateji prioritetlər kimi müəyyənləşdirilib.
Tədbirin sonunda Yeni Azərbaycan Partiyasının yaradılmasının 33-cü ildönümü münasibətilə rayonun ictimai-siyasi həyatında fəal iştiraklarına görə şəhid atası, Vətən müharibəsi veteranı, Birinci Qarabağ müharibəsi iştirakçıları və təhsil işçisi fəxri fərmanlarla təltif olunub, Partiya sıralarına yeni qəbul olunmuş üzvlərə üzvlük vəsiqələri təqdim olunub.
