Üzeyir Hacıbəyli adına Bakı Musiqi Akademiyasının Opera Studiyasında Cüzeppe Verdinin “Trubadur” (“İl trovatore”) operası təqdim olunub.
“Tehsil365“ “AZƏRTAC”a istinadla xəbər verir ki, bu əsər dahi bəstəkarın “Traviata” və “Riqoletto” operaları ilə birlikdə onun “məşhur trilogiya” silsiləsini tamamlayır. Musiqi əsəri dörd pərdə boyunca sarsılmaz intensivliyi ilə dünya operasının xəzinəsidir və 170 ildən çoxdur ki, musiqisevərlər və opera həvəskarları arasında böyük populyarlıq qazanıb, hər təqdimatında geniş auditoriyanı cəlb edib.
Bu italyan ehtirasları sonuncu dəfə bir neçə il əvvəl Bakı səhnəsində coşub və indi tamaşaçılar yenidən barışmaz düşmənçilik, sədaqətli sevgi, güclü toqquşmalar və güclü duyğular hekayəsinin şahidi olublar.
Anşlaqla keçən həmin axşam dünya opera hitləri yenidən tamaşaçılar qarşısında ifa edilib: Miserere xoru, zindanlara çəkic zərbələrinin səsi fonunda qaraçı xoru, Leonoranın “Tacea la notte plançıda” kavatinası, Manrikonun "Di quella pira" ariyası və Qraf di Lunanın ən populyar ariyası “Il balen del suo sorriso”. Bunlara, həmçinin Azusenanın “Sol, son tuo figlio?” və “Stride la vampa” kimi ariyaları və səhnələri, eləcə də izdihamlı auditoriyadan bəzən “Bravo” qışqırıqları ilə müşayiət olunan Leonora ilə Manrikonun dueti də daxil idi.
Aparıcı rolları Azərbaycan vokal sənətinin tanınmış simaları ifa edirdilər. Azərbaycanın Əməkdar artisti Afaq Abbasova Leonoranı, Əməkdar artist Fərid Əliyev Manrikonu ustalıqla canlandırırdı. Qraf di Luna rolunda istedadlı vokalist Taleh Yəhyayev geniş emosiyaları çatdırmağı bacardı. Əməkdar artist Anton Ferştandt şəhər qvardiyasının rəisi Ferrando rolunu oynadı. Əməkdar artist Səbinə Əsədova səhnəyə Azusena rolunda çıxıb və baş rollarından birində dərin mezzo-soprano ifası ilə tamaşaçıları valeh edib. Tamaşada, həmçinin teatrın solistləri Səma Həmzəyeva Leonoranın dostu İnes və İqor Yadrov qoca qaraçı rollarını canlandırıblar.
Azərbaycan Dövlət Akademik Opera və Balet Teatrının Simfonik Orkestrinə Əməkdar artist Əyyub Quliyev dirijorluq edirdi.
İtalyan dilində səhnələşdirilən tamaşa dramatik süjeti və virtuoz ifaları ilə paytaxtın mədəni həyatında silinməz iz buraxıb. Tamaşaçıların uzun sürən alqışları da bunu təsdiqləyirdi.
Tamaşanın rejissoru Əməkdar artist Hafiz Quliyev, xormeysteri isə Əməkdar artist Sevil Hacıyeva idi.