İdman sahəsinə maraq göstərən gənclərin sayı artdıqca, müxtəlif idman ixtisaslarına yönələn tələbələrin də hazırlıq səviyyəsi diqqət çəkir. Bu ixtisaslar həm nəzəri, həm də praktiki bilik tələb etdiyinə görə tələbələrin mühitə uyğunlaşması mühüm rol oynayır.
Azərbaycan İdman Akademiyasında stolüstü tennis üzrə məşqçilik ixtisasında təhsil alan Məmmədova Nübar mövzu ilə bağlı “Tehsil365”ə öz fikirlərini bölüşüb.
O bildirib ki, akademiyada dərs mühiti həm nəzəri, həm də praktiki hazırlığa əsaslanır:
“Dərslər peşəkar müəllimlər tərəfindən keçirilir, məşqlər isə xüsusi avadanlıqlarla təchiz olunmuş zallarda aparılır. Akademiyada motivasiya yüksəkdir, tələbələr intizamlı və məqsədyönlü olur.”
Nübar ixtisasının mahiyyətindən danışaraq bildirib ki, stolüstü tennis üzrə məşqçilik həm geniş bilik, həm də yüksək səviyyəli fiziki hazırlıq tələb edir:
“Biz texniki fəndləri, oyun strategiyalarını, fiziki hazırlıq proqramlarını və məşq metodikasını öyrənirik. Bundan əlavə, idman fiziologiyası, psixologiyası və hakimlik kimi dərslər də tədris olunur.”
Onun sözlərinə görə, bu ixtisas tələbələrə gələcəkdə peşəkar məşqçi kimi formalaşmaq və idman sahəsində ixtisaslaşmaq üçün geniş imkan yaradır.
Gələcəkdə bu sahəyə gəlmək istəyənlərə tövsiyə verən Nübar bildirib:
“İlk növbədə fiziki hazırlıq üzərində işləmək vacibdir. Stolüstü tennis sürət, reaksiya və çeviklik tələb edir. Eyni zamanda intizamlı olmaq, qaydaları bilmək və davamlı məşq etmək lazımdır.”
O əlavə edib ki, məqsədli olmaq, özünü inkişaf etdirməyə açıq olmaq və idmana ciddi yanaşmaq bu sahədə uğur üçün əsas şərtlərdir.