Azərbaycanın turizm sektoru son illər ölkənin iqtisadi inkişaf templərinə uyğun şəkildə yüksələn xətlə inkişaf edir. Xarici turistlərin axınının artması, regionlarda yeni infrastrukturun yaradılması və postmüharibə dövrünün yaratdığı yeni imkanlar bu sahəni ölkənin prioritet istiqamətlərindən birinə çevirib.
Turizm eksperti Rahim Quliyev mövzu ilə bağlı “Tehsil365”ə fikirlərini bölüşüb.
Quliyevin sözlərinə görə, Azərbaycan turizminin gənc olmasına baxmayaraq, inkişaf tempi olduqca sürətlidir:
“Son illərdə ölkəyə gələn xarici turistlərin və yerli turistlərin regionlara axınında ciddi artım var. Bu artım ölkədə sabitlik, ictimai asayiş və siyasi təhlükəsizliyin yüksək səviyyədə təmin olunması ilə sıx bağlıdır.”
Ekspert bildirir ki, 3–5 il əvvəl Azərbaycanın Qarabağda müharibə xəbərləri ilə gündəmdə olması turistlərdə müəyyən tərəddüd yaradırdı, lakin bu gün vəziyyət tam dəyişib:
“Azərbaycan ərazi bütövlüyünü bərpa etmiş qalib ölkədir. Bu, beynəlxalq aləmdə həm turistlərin, həm də investorların ölkəyə inamını artırıb.”
Onun sözlərinə görə, son illər ölkədə keçirilən beynəlxalq tədbirlərin sayı da turizmin inkişafında xüsusi rol oynayıb:
“Qlobal səviyyəli ailə konfransları, dövlət başçıları tərəfindən keçirilən görüşlər, xüsusən Şuşada təşkil olunan tədbirlər dünya mediasında geniş işıqlandırılıb və ölkəmiz üçün böyük reklam effekti yaradıb.”
Quliyev əlavə edib ki, pandemiyadan sonrakı dövrdə Azərbaycan daha güclü beynəlxalq imic qazanıb və bu, turist axınını artıran əsas səbəblərdəndir.
Ekspert turistlərin ölkəyə səfərlərində təhlükəsizliyin əsas meyar olduğunu vurğulayır:
“Biz başqa ölkəyə gedəndə birinci təhlükəsizliyə baxırıq. Azərbaycanda isə ictimai asayişin yüksək səviyyədə qorunması turistlər üçün çox böyük üstünlükdür.”
Quliyev həmçinin qeyd edib ki, turist axını ilə yanaşı, ölkəyə minlərlə xarici tələbənin də gəlməsi iqtisadiyyata mühüm töhfə verir:
“Xarici tələbələrin xərcləri turistlərin xərclədiyi məbləğdən dəfələrlə çoxdur. Bu, ölkə iqtisadiyyatını gücləndirən amildir.”
Ekspert tibbi turizmin inkişaf perspektivlərinə də toxunub:
“Azərbaycanda müasir klinikalar, peşəkar həkimlər və termal sanatoriyalar tibbi turizmi genişləndirməyə imkan verir. Naftalan, Şabran və xüsusilə Qarabağdakı termal ərazilər bu sahənin gələcəyini müəyyən edən əsas nöqtələrdir.”
Onun sözlərinə görə, Laçın, Kəlbəcər və Zəngilandakı müalicəvi sular, eləcə də Zəngilandakı Götürsü bulağı yaxın illərdə böyük tibbi turizm mərkəzinə çevrilə bilər:
“SSRİ dövründə fəaliyyət göstərmiş sanatoriyaların 5–10 ilə tam gücü ilə yenidən işə düşməsi real görünür.”
Quliyev sonda Qarabağ bölgəsində tikilən Zəngilan, Füzuli və Laçın beynəlxalq hava limanlarının da turizmə ciddi təkan verəcəyini deyib:
“Bu hava limanları sayəsində birbaşa xarici reyslər açılacaq və regionun turizm potensialı daha sürətli inkişaf edəcək.”