21–23 noyabr 2025-ci il tarixlərində Azərbaycan Respublikası Elm və Təhsil Nazirliyinin Botanika İnstitutunda “III Beynəlxalq Apiterapiya və Təbiət” Konqresi təşkil olunub. Konqres Azərbaycan Respublikası Elm və Təhsil Nazirliyi Botanika İnstitutu, Naxçıvan Dövlət Universiteti, Karadeniz Texnik Universiteti və Gümüşhane Universitetinin birgə əməkdaşlığı ilə baş tutub.
"Tehsil365" xəbər verir ki, tədbirdə Naxçıvan Dövlət Universitetinin rektoru Elbrus İsayev çıxış edərək konqresin əhəmiyyətindən danışıb. O bildirib ki, əsası 2023-cü ildə Naxçıvanda qoyulan konqres bu günədək tədqiqatçılar arasında birgə elmi araşdırmaların aparılmasına mühüm töhfə verib, yerli və beynəlxalq elm-təhsil müəssisələri arasında əməkdaşlıq imkanlarını daha da genişləndirib. Rektor universitetdə Azərbaycan təbiətinin, flora və faunasının öyrənilməsinin hər zaman prioritet sahə olduğunu, bu istiqamətdə mühüm addımlar atıldığını vurğulayıb. O, həmçinin NDU-da arıçılıq məhsullarına əsaslanan alternativ təbabət üzrə qida əlavələri, təmizlik vasitələri və digər məhsulların hazırlandığını diqqətə çatdırıb.
Konqresdə Azərbaycanla yanaşı, bir sıra xarici ölkələrdən alimlər, mütəxəssislər və apiterapiya sahəsində fəaliyyət göstərən tədqiqatçılar iştirak ediblər. Tədbirin əsas məqsədi bal, vərəmum, arı südü, arı zəhəri və digər arı məhsullarının elmi tədqiqi ilə məşğul olan mütəxəssisləri bir araya gətirmək, elmi müzakirələr aparmaq, beynəlxalq əməkdaşlığı gücləndirmək və yeni elmi layihələrin yaranmasına dəstək olmaqdır.
Qeyd edək ki, konqresin əvvəlki mərhələləri 2023-cü ildə Naxçıvan şəhərində, 2024-cü ildə isə Türkiyənin Trabzon şəhərində keçirilib.
