Naxçıvan Dövlət Universitetinin Beynəlxalq münasibətlər və hüquq fakültəsində istedadlı tələbələrlə görüş təşkil olunub.
“Tehsil365” xəbər verir ki, görüşdə universitetin rektoru Elbrus İsayev çıxış edərək tələbələr üçün yaradılan imkanlar və mövcud dəstək mexanizmləri barədə məlumat verib. Rektor universitetdə fəaliyyət göstərən Tələbə Elmi Cəmiyyəti, Tələbə Həmkarlar İttifaqı Komitəsi və digər tələbə təşkilatlarının fəaliyyəti haqqında danışaraq gəncləri bu qurumlara qoşulmağa, universitetin ictimai həyatında fəal iştirak etməyə təşviq edib.
“Açıq mikrofon” formatında keçirilən görüş zamanı tələbələr öz fikir və təkliflərini səsləndirərək suallarını ünvanlayıblar. Rektor Elbrus İsayev bütün sualları cavablandırıb.
Tədbirin sonunda yeni yaradılan “Tələbə İstedad Bankı” layihəsinin və istedadmerkezi.net saytının təqdimatı keçirilib.
Tələbələrlə iş və tədbirlərin təşkili sektorunun müdiri Hüseyn İmanov layihə haqqında məlumat verərək bildirib ki, bu təşəbbüs universitetin istedadlı gənclərinin aşkara çıxarılması və tanıdılması istiqamətində mühüm addımdır. O qeyd edib ki, layihə istedad sahələrinə uyğun 19 alt kateqoriyadan ibarətdir və fakültələrin, tələbə təşkilatlarının fəal gənclərinin məqalə, layihə və digər istedadları barədə məlumatları əhatə edir. Yeni istifadəyə verilməsinə baxmayaraq, layihəyə artıq 1000-dən çox tələbə müraciət edib.
Layihədə iştirak etmək istəyən tələbələr istedadmerkezi.net saytına daxil olaraq qeydiyyatdan keçə bilərlər.
