Noyabrın 21-də Naxçıvan Dövlət Universitetinin Elmi Kitabxanasında universitetin “Azərbaycan tarixi” kafedrasının professoru Sevinc Abbasovanın müəllifi olduğu, Azərbaycan və ingilis dillərində nəşr olunan “İlham Əliyev: qadınlara istiqamətli qlobal təşəbbüslər və gender bərabərliyinin inkişafı (2003–2023)” adlı kitabın təqdimatı keçirilib.
“Tehsil365” xəbər verir ki, tədbirdə Naxçıvan Dövlət Universitetinin rektoru Elbrus İsayev çıxış edərək Ulu Öndər Heydər Əliyev tərəfindən əsası qoyulan dövlət qadın siyasətinin bu gün Prezident İlham Əliyev tərəfindən uğurla davam etdirildiyini vurğulayıb. Rektor bildirib ki, “Konstitusiya və Suverenlik İli” çərçivəsində keçirilən təqdimatın məhz bu dövrə təsadüf etməsi təsadüfi deyil. O qeyd edib ki, ölkəmizdə qadın hüquqlarının qorunması, sosial ədalət və insan ləyaqətinin təmin edilməsi Azərbaycan Konstitusiyasının və dövlət suverenliyinin əsas dəyərlərindəndir. Elbrus İsayev kitab müəllifinin tarixi faktlara və etibarlı mənbələrə əsaslanaraq dəyərli bir iş ortaya qoyduğunu bildirib.
NDU-nun Elm və innovasiya məsələləri üzrə prorektoru Elsəvər Əsədov çıxışında vurğulayıb ki, kitabda Azərbaycanda qadınların təhsil hüquqları, gender bərabərliyi və sosial inkişafla bağlı mühüm materiallar yer alıb. Qeyd edilib ki, nəşr universitetin Elmi Şurasının qərarı ilə çap olunub.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin şöbə müdiri Könül Babayeva kitabı Azərbaycan gender siyasətinin son 20 illik xronologiyası adlandırıb. O bildirib ki, belə nəşrlər həm tədqiqatçılar üçün dəyərli mənbə rolunu oynayır, həm də gəncləri cəmiyyətə aktiv sosial mövqe tutmağa həvəsləndirir.
Tədbirdə “Azərbaycan tarixi” kafedrasının müdiri Xəzər Hüseynov, Bakı Dövlət Universitetinin müəllimi Vəsilə Möhsümova, Naxçıvan Hərbi Kollecinin rəisi polkovnik Yaşar Hüseynov, Tarix-filologiya fakültəsinin dekan müavini Qadir Əkbərov, “Azərbaycan ədəbiyyatı” kafedrasının müdiri Nurlana Əliyeva və “Jurnalistika və xarici ölkələr ədəbiyyatı” kafedrasının müdiri Şəhla Şirəliyeva çıxış edərək kitabın müzakirələr üçün geniş imkan yaratdığını və mühüm bir tədqiqat əsəri olduğunu bildiriblər.
Sonda kitabın müəllifi, professor Sevinc Abbasova nəşrin ərsəyə gəlməsində dəstək göstərən hər kəsə və universitet rəhbərliyinə yaradılan elmi imkanlara görə təşəkkürünü bildirib.
Qeyd edək ki, kitabda 2003–2023-cü illər ərzində Ulu Öndər Heydər Əliyev, Prezident İlham Əliyev, Birinci vitse-prezident Mehriban Əliyeva və Heydər Əliyev Fondu tərəfindən həyata keçirilən və müstəqil Azərbaycanın inkişafında mühüm rol oynayan gender siyasətinin əsas istiqamətləri əhatə olunub.
