Azərbaycan Dillər Universitetində Beynəlxalq Münasibətlər və Regionşünaslıq fakültəsinin təşkilatçılığı ilə akademik Yusif Məmmədəliyevin 120 illik yubileyinə həsr olunmuş “Yusif Məmmədliyev fenomeni: elmi nailiyyətləri” mövzusunda elmi seminar keçirilmişdir. Seminarı giriş sözü ilə fakültə dekanı professor İbrahim Kazımbəyli açaraq qeyd edib ki, tədbirin keçirilməsi Azərbaycan Respublikasının Prezidenti İlham Əliyevin Yusif Məmmədəliyevin anadan olmasının 120 illiyi ilə bağlı imzaladığı sərəncama əsaslanır. İbrahim Kazımbəyli Yusif Məmmədəliyevin həyatı və elmi fəaliyyəti haqqında dərin və məzmunlu çıxış edərək bildirib ki, o, nəinki Azərbaycan və SSRİ-də, hətta dünya çapında tanınmış alim olmuşdur. İ. Kazımbəyli Azərbaycanda Elmlər Akademiyasının açılmasında onun xüsusi xidməti olduğunu vurğulayıb.
“Tehsil365” bildirir ki, daha sonra Qafqazşünaslıq və Azərbaycan tarixi kafedrasının dosenti Namiq Kərimov çıxış edərək, Yusif Məmmədəliyevin kimya sahəsində əsas tədqiqatlar apardığı 1930–1960-cı illərdə dünya kimya elmi sahəsində mövcud olan əsas tendensiyalar fonunda onun elmi yaradıcılığına yanaşma sərgiləyib. Yusif Məmmədəliyevin II Dünya müharibəsi gedişində yüksək oktanlı aviasiya yanacağının hazırlanması və onun müharibədə oynadığı rolu, eləcə də 1959-cu ildə Şamaxıda Astrofizika rəsədxanasının yaradılması istiqamətində fəaliyyəti, Əlyazmalar Fondunun yaradılması və digər işləri haqqında geniş danışıb.
Beynəlxalq Münasibətlər kafedrasının müəllimi Günel Hacalıyeva Yusif Məmmədəliyevin parlaq və çoxşaxəli şəxsiyyəti, vətənsevərliyi və sülhsevərliyi haqqında məlumat verib, həmçinin onun kimya sahəsindəki ixtiralarının cəmiyyət və insanlıq üçün faydasını vurğulayıb. O, alimin AMEA-nın prezidenti kimi elmi və idarəçilik fəaliyyəti və bu yolda qarşılaşdığı çətinliklər barədə də önəmli məqamlara toxunub.
Müzakirələr zamanı akademikin həyatı, elmi fəaliyyəti, ixtiraları və ev-muzeyindən görüntülər təqdim edilərək tədbir daha təsirli və yaddaqalan olub. Təqdimatlardan sonra Qərb ölkələri üzrə Regionşünaslıq kafedrasının müdiri professor Sevdagül Əliyeva və həmin kafedranın professoru Əli Məmmədov mövzu ətrafında maraqlı fikir və mülahizələrini bölüşüblər.