Azərbaycan Dillər Universitetində (ADU) “Süni intellekt və humanitar elmlər: Müasir vəziyyət və perspektivlər” mövzusunda beynəlxalq elmi konfrans təşkil olunub. Konfransda müxtəlif ölkələrdən olan alimlər, tədqiqatçılar və mütəxəssislər iştirak edərək müasir dövrdə süni intellektin elmi-tədqiqat, təhsil və humanitar sahələrdəki roluna dair fikir və təcrübələrini bölüşüblər.
“Tehsil365” xəbər verir ki, Misirin Azərbaycandakı Səfirliyi, Misir Mədəniyyət və Təhsil Əlaqələri Mərkəzinin rəhbəri Prof. Dr. Tarek M. Aboul-Fotouh konfrans haqqında təəssüratlarını bölüşüb:
“Bu konfrans çox faydalı və maraqlıdır. Təqdim olunan işlərin hər biri elmi baxımdan yüksək keyfiyyətə malikdir və müxtəlif sahələri əhatə edir, həm süni intellektin tətbiqi, həm də humanitar elmlərlə əlaqəsi baxımından diqqət çəkir. Mən xüsusilə birinci sektorda olan təqdimatları izlədim və orada təqdim olunan məqalələrin səviyyəsi məni dərin təəssüratlandırdı. Hər bir təqdimat həm mövzuya aid elmi araşdırmaları əks etdirir, həm də tədqiqat metodologiyasının düzgün tətbiqini nümayiş etdirir.
Eyni zamanda, digər sektorların işləri də çox maraqlıdır və hər biri öz sahəsində yeni perspektivlər açır, həm nəzəri, həm də praktik baxımdan dəyərli töhfələr verir. Belə tədbirlərin keçirilməsi yalnız elmi əməkdaşlığın inkişafına xidmət etmir, həm də beynəlxalq təcrübə və fikir mübadiləsi üçün geniş imkanlar yaradır. Bu cür konfranslar gənc tədqiqatçılar üçün stimul rolunu oynayır, onların bilik və bacarıqlarını artırır, elmi ideyaların müzakirəsi və innovativ yanaşmaların formalaşması üçün unikal platforma təqdim edir.”
Bakı Dövlət Universiteti İqtisadi və Humanitar Kollecinin müəllimi Heydərova Nuray tədbirlə bağlı fikirlərini bildirib:
“İlk növbədə universitetə və mütəxəssislərə belə yüksək səviyyəli konfransın təşkilinə imkan yaratdıqları üçün təşəkkür etmək istərdim. Bu konfrans süni intellekt və onun humanitar elmlərlə inteqrasiyası mövzusunda çox maraqlı təqdimatlar və fikir mübadiləsi imkanı yaratdı. Mən ümid edirəm ki, gələcəkdə bu cür daha çox konfranslar keçiriləcək, elmi araşdırmalar daha genişləndiriləcək və iştirakçılar üçün əlavə təcrübə imkanları yaranacaq.
Xüsusilə gənc tədqiqatçılar üçün süni intellektin tətbiqi sahəsində biliklərini artırmaq və yeni yanaşmalar öyrənmək üçün böyük fürsət yaranır. Bu cür tədbirlər həm elm sahəsində inkişafı təşviq edir, həm də beynəlxalq əməkdaşlıq üçün geniş imkanlar açır.”
Özbəkistan Renessans Universitetinin müəllimi, PhD Abdullaayeva Dilobar Ötkırovna konfransı belə qiymətləndirib:
“Azərbaycan Dillər Universitetində keçirilmiş ‘Süni intellekt və humanitar elmlər’ adlı beynəlxalq konfrans mənim üçün böyük elmi və praktik əhəmiyyət kəsb etdi. Tədbir humanitar sahələrdə süni intellektin tətbiqi üçün yeni imkanlar açır və müxtəlif ölkələrdən gəlmiş alimlər arasında təcrübə mübadiləsinə zəmin yaradır.
Burada təqdim olunan məruzələr süni intellektin tədqiqat, təhsil və mədəniyyət sahələrində hansı potensiala malik olduğunu bir daha nümayiş etdirdi. Süni intellekt bu gün qlobal elmi inkişafın əsas istiqamətlərindən biridir və onun düzgün tətbiqi gələcək cəmiyyətlərin formalaşmasında mühüm rol oynayır.
Konfrans iştirakçıları yeni ideyalar və yanaşmalarla tanış olaraq, gələcək əməkdaşlıqlar üçün geniş perspektivlər əldə etdilər. Bu isə humanitar elmlərin inkişafında süni intellektin rolunu daha da artırmağa xidmət edir.”
Akala Universitetinin Dil və Ədəbiyyatın Tədrisi fakültəsinin dekanı Xesus Qarsia Laborda konfransın əhəmiyyətini belə dəyərləndirib:
“Azərbaycan Dillər Universitetində keçirilən bu beynəlxalq konfransda iştirak etmək mənim üçün böyük bir məmnuniyyət oldu. Tədbir çərçivəsində süni intellektin humanitar elmlərlə kəsişdiyi məqamlara dair təqdim olunan çoxsaylı yenilikçi yanaşmalar məni xüsusilə təsirləndirdi. Süni intellekt artıq yalnız texnologiya sahəsinə aid bir anlayış deyil — o, dillərin öyrədilməsi, mədəniyyətlərarası ünsiyyət, eləcə də tədris metodikası kimi humanitar sahələrin inkişafını sürətləndirən mühüm faktora çevrilir.
Xüsusilə dil və ədəbiyyatın tədrisində süni intellektin tətbiqi müəllimlər üçün geniş imkanlar yaradır, tələbələr isə daha interaktiv, fərdiləşdirilmiş və dinamik öyrənmə mühitinə sahib olurlar. Konfrans çərçivəsində aparılan elmi müzakirələr göstərdi ki, süni intellekt yaxın gələcəkdə təhsilin yenilənməsi və yeni pedaqoji modellərin formalaşmasında əsas istiqamətlərdən biri olacaq.
Burada təqdim olunan tədqiqatlar həm nəzəri, həm də praktik baxımdan yeni perspektivlər açır. Mən, xüsusilə, müxtəlif ölkələrdən gəlmiş mütəxəssislər arasında fikir mübadiləsinin çox məhsuldar olduğunu qeyd etmək istəyirəm — bu cür əməkdaşlıqlar həm yeni ideyaların yaranmasına, həm də gələcək layihələrin formalaşmasına şərait yaradır.
Azərbaycan Dillər Universitetinin belə bir elmi müzakirə platforması yaratması son dərəcə dəyərlidir. Ümid edirəm ki, bu ənənə davam edəcək və biz süni intellektin humanitar elmlər sahəsində rolunu daha dərindən araşdırmaq üçün yenidən bir araya gələcəyik.”
ADU-nun Linqvokulturologiya kafedrasının dosenti Fərəcova Elina konfransla bağlı təəssüratlarını bölüşüb:
“Düşünürəm ki, bu konfrans müasir dövrdə bizim üçün böyük əhəmiyyət kəsb edir, həm müəllimlər, həm də tələbələr üçün çox faydalıdır. Bu konfrans süni intellektin həyatımızdakı rolunu və onun müasir texnologiyanın inkişafındakı əhəmiyyətini nümayiş etdirir.
İstər müəllimlər, istər tələbələr üçün belə konfransların keçirilməsi çox vacibdir. Artıq dərslərimizdə və tədqiqat işlərimizin yazılmasında süni intellektdən geniş istifadə edirik. Bu texnologiyanın düzgün tətbiqini öyrənmək və tələbələrimizə tədris etmək elmi və tədris fəaliyyətimiz üçün böyük önəm daşıyır. Eyni zamanda, belə tədbirlər bizə yeni yanaşmalar öyrənmək, təcrübə mübadiləsi aparmaq və süni intellektin humanitar elmlərə inteqrasiyasını daha dərindən anlamaq imkanı yaradır.”