“Məktəbəqədər təhsil müəssisələri üçün qrant müsabiqəsinin qalibi olan 63 bağçanın artıq mövcud uşaqları varsa və onların məlumatları Məktəbəqədər Təhsil Müəssisələrinin İnformasiya Sisteminə daxil edilibsə, həmin uşaqlar dekabr ayından başlayaraq qrant hesabına təhsilini davam etdirəcəklər”.
“Tehsil365” xəbər verir ki, bu barədə Elm və Təhsil Nazirliyinin Satınalmalar və qrantlar sektorunun müdiri Vüsalə Əliyeva Təhsil TV-də yayımlanan “Təhsildəyik” podkastında məlumat verib.
O bildirib ki, söhbət yalnız Azərbaycan bölməsində təhsil alan uşaqlardan gedir: “Yəni qrant müsabiqəsinin qalibi olmuş bağçaların sistemə daxil edilmiş Azərbaycan bölməsində oxuyan uşaqların təhsil haqqının 250 manatlıq hissəsi dekabr ayından başlayaraq qrant hesabına, digər hissə isə valideyn tərəfindən ödəniləcək.
Bağçaların boş yerləri isə bq.edu.az portalı üzərindən digər valideynlərin seçiminə çıxarılacaq”.