BDU-nun rektoru "QS Eurasia Forum 2025" çərçivəsində sessiyada çıxış edib
“Tehsil365”xəbər verir ki,Bakı Dövlət Universitetinin (BDU) rektoru Elçin Babayev 2025-ci il 25-26 noyabr tarixlərində Özbəkistanın Daşkənd şəhərində keçirilən "Broadening horizons: Building global bridges in higher education" mövzusuna həsr olunmuș "QS Eurasia Forum 2025" tədbiri çərçivəsində sessiyada çıxıș edib. "Masterclass Building the bridge: How to foster new international partnerships" adlanan sessiyaya QS Agentliyinin regional direktoru Sergey Xristolyubov moderatorluq edib.
Sessiyada beynəlxalq əməkdaşlıq, ali təhsildə strateji tərəfdaşlıqların formalaşdırılması və dayanıqlı inkişaf modelləri müzakirə olunub. Tədbirdə Azərbaycan Dövlət Neft və Sənaye Universitetinin rektoru Rufət Əzizov, Széchenyi lstván Universitetinin Biznes inzibatçılığı elmləri üzrə Doktorantura Məktəbinin direktoru László Vasa və "British Council" şirkətinin Özbəkistan nümayəndəliyinin direktor müavini Cəmilə Gülyamova çıxış ediblər.
Çıxış zamanı Elçin Babayev BDU-nun beynəlxalq əməkdaşlıq strategiyasının Universitetin akademik inkişafına, tədqiqat fəaliyyətinə, institusional dayanıqlılığına və qlobal tanıdılmasına verdiyi töhfələri xüsusi vurğulayıb. Rektor BDU-nun beynəlxalq fəaliyyətinin əsas istiqamətlərini tələbə və müəllim mübadiləsi, beynəlxalq fakültə və institutların yaradılması, ikili diplom proqramlarının həyata keçirilməsi, beynəlxalq qrant layihələrində iștirak, qlobal assosiasiya və şəbəkələrdə təmsilçilik, həmçinin beynəlxalq reytinq agentlikləri ilə əməkdaşlıq kimi prioritetlərlə izah edib.