17-21 noyabr tarixlərində Almaniyanın Hamburq şəhərində Beynəlxalq Erkən Öyrənmə və Uşaq Rifahı Tədqiqatının (IELS 2025) milli layihə menecerlərinin sayca 7-ci görüşü baş tutdu.
“Tehsil365” xəbər verir ki, görüş İqtisadi Əməkdaşlıq və İnkişaf Təşkilatı (OECD), Təhsil Nailiyyətlərinin Qiymətləndirilməsi üzrə Beynəlxalq Assosiyasiya (IEA) və Avstraliya Təhsil Araşdırmaları Şurasının (ACER) birgə təşkilatçılığı ilə baş tutub və beynəlxalq qiymətləndirmədə iştirak edən 9 ölkə bir araya gətirilib.
Milli layihə menecerləri tədqiqatın əsas mərhələsinin icrası barədə məlumatlar təqdim ediblər. Ölkələr öz təcrübələrini paylaşaraq növbəti mərhələlərdə nəzərə alınacaq məqamlar barədə fikir mübadiləsi aparıblar.
İştirakçılar üçün təşkil olunan praktiki sessiyalar vasitəsilə qiymətləndirmə çərçivəsində toplanmış məlumatların işlənməsi və təhlili üzrə üsullar nümayiş etdirilib. Bu sessiyalar layihə çərçivəsində məlumatların işlənməsi prosesinə dair ümumi anlayışın formalaşmasına kömək edib.
Sessiyalar beynəlxalq əməkdaşlığın gücləndirilməsi, iştirakçı ölkələr arasında koordinasiyanın artırılması baxımından əhəmiyyətli olub. Görüş, həmçinin, növbəti fəaliyyət mərhələləri üçün ortaq yanaşmanın müəyyənləşdirilməsinə şərait yaradıb.
Məlumat üçün bildirək ki, IELS 5 yaşlı uşaqların inkişafını çoxölçülü şəkildə qiymətləndirən beynəlxalq qiymətləndirmədir. Qiymətləndirmə məktəbəqədər dövrdə uşaqların ilkin savadlılıq, ilkin hesablama, sosial-emosional, özünütənzimləmə və özünüidarə kimi bacarıqlarını beynəlxalq standartlara uyğun ölçür.
Azərbaycan Respublikasının Təhsil İnstitutu (ARTİ) tərəfindən təşkili icra olunan qiymətləndirmə çərçivəsində toplanmış məlumatlar erkən uşaqlıq təhsilinin inkişaf istiqamətlərini müəyyənləşdirmək məqsədilə istifadə olunacaq. Qeyd edək ki, görüşdə ARTİ-nin Milli və Beynəlxalq Qiymətləndirmələr şöbəsinin əməkdaşı Sevinc Əsədova iştirak etmişdir.
IELS 2025 qiymətləndirmə tədqiqatının beynəlxalq hesabatının 2026-cı ilin aprel ayında təqdim ediləcəyi gözlənilir və hazırda bu istiqamətdə müvafiq hazırlıq prosesləri davam etdirilir.