Azərbaycan Dillər Universiteti (ADU) Qərb ölkələri üzrə Regionşünaslıq kafedrası, Tələbə Elmi Cəmiyyəti və Magistratura Şöbəsinin təşkilatçılığı ilə Teams platforması üzərindən tələbə və magistrantlar üçün “Akademik Tezisin Yazılması və Auditoriya Qarşısında Effektiv Çıxış” mövzusunda onlayn təlim keçirilib.
“Tehsil365” bildirir ki, təlim Qərb ölkələri üzrə Regionşünaslıq kafedrasının baş müəllimi Sevinc Qurbanovanın moderatorluğu ilə Qərb ölkələri üzrə Regionşünaslıq kafedrasının baş müəllimi Xəyalə Ağayev tərəfindən aparılıb. Təlimin əsas məqsədi iştirakçıların elmi yazı bacarıqlarını təkmilləşdirmək, tezis hazırlama prosesinin struktur və metodoloji tələblərini izah etmək, həmçinin kütlə qarşısında çıxış zamanı tətbiq olunan əsas prinsipləri aşılamaq olub.
Təlim zamanı akademik yazının ciddi struktur tələb etdiyi, mövzu seçiminin elmilik, aktuallıq və tədqiqat boşluqlarının müəyyən olunması ilə bağlı məsələlərə diqqət çəkilib. İştirakçılara tezisin başlıq səhifəsinin hazırlanmasından başlayaraq giriş, metodologiya, təhlil, nəticələr və ədəbiyyat siyahısının tərtibatına qədər bütün mərhələlər üzrə praktiki nümunələr təqdim olunub.
Həmçinin, təlim çərçivəsində istinad və sitatvermə qaydaları, plagiatın qarşısının alınması və akademik etika prinsipləri ətraflı izah edilib. Beynəlxalq istinad formatlarının tətbiqi və düzgün elmi istinadın vacibliyi xüsusi vurğulanıb.
Təlimin ikinci hissəsində auditoriya qarşısında çıxış bacarıqları müzakirə olunub. Təlimçi elmi nitqin məntiqli, ardıcıl və əsaslandırılmış şəkildə qurulmasının vacibliyini, bədən dili, nitq ritmi, vurğu və səs tonunun auditoriya ilə effektiv ünsiyyətdə mühüm rol oynadığını qeyd edib. Təlimin sonunda iştirakçıların sualları cavablandırılıb.
Qərb ölkələri üzrə Regionşünaslıq kafedrasının müdiri, prof. Sevdagül Əliyeva tədbiri akademik bacarıqların inkişafı və gənc tədqiqatçıların elmi fəaliyyətə daha sistemli yanaşmasının təmin olunması baxımından mühüm addım kimi qiymətləndirib.