Azərbaycan Dillər Universitetində (ADU) tələbələrin təcrübəyə hazırlanması və onların əmək bazarına uğurlu inteqrasiyasına dəstək məqsədilə “Tələbələrin Təcrübəyə Hazırlığı və Əmək Bazarı Nümayəndələri ilə Görüş: Tövsiyələr, Təlimatlar və Təkliflər” adlı tədbir keçirilib. BMR fakültəsinin Beynəlxalq Münasibətlər kafedrasının təşkilatçılığı ilə baş tutan görüş tələbələrin peşəkar inkişafına yönəlik mühüm təşəbbüslərdən biri olub.
“Tehsil365” xəbər verir ki, tədbirdə Ombudsman Aparatının Hüquqi Maarifləndirmə Sektorunun müdiri Müqalib Mahmudov çıxış edərək ADU-nun Beynəlxalq Münasibətlər və Regionşünaslıq ixtisaslarını bitirən məzunların əmək bazarında yeri və rolu barədə məlumat verib. O, Ombudsman Aparatında tələbələrin təcrübə keçməsi imkanları, işə qəbul prosesində tələb olunan bilik və bacarıqlar, habelə hüquqi savadlılığın artırılmasının vacibliyi barədə danışıb. Mahmudov qeyd edib ki, təcrübə proqramları tələbələrin real iş mühitinə daha hazırlıqlı daxil olmasına mühüm töhfə verir.
Daha sonra Əmək Bazarı və Sosial Müdafiə Məsələləri üzrə Milli Observatoriyanın əmək bazarı və sosial müdafiə sahəsi üzrə tədqiqat departamentinin müdir müavini Əli Tağızadə müasir süni intellekt dövründə tələbələrin inkişaf etdirməli olduqları yumşaq bacarıqların (soft skills) əhəmiyyətini vurğulayıb. O, həmçinin komputer bacarıqları və dil biliklərinin əmək bazarında tələbələrə yaratdığı üstünlüklərdən, yaxın gələcəkdə sıradan çıxacaq və daha çox tələb olunacaq peşələrdən bəhs edib. Tağızadə bildirib ki, müasir əmək bazarının sürətlə dəyişən tələblərinə uyğunlaşmaq üçün tələbələrin nəzəri biliklərlə yanaşı, praktiki bacarıqlara da malik olması vacibdir.
Tədbirin sonunda qeyd olunub ki, ADU ilə əmək bazarının müxtəlif nümayəndələri arasında qurulan sıx əməkdaşlıq tələbələr üçün təcrübə imkanlarını genişləndirir. Bu tip görüşlər tələbələrə real iş mühitinin tələbləri barədə biliklər verir, onların peşəkar inkişafını gücləndirir və karyeraya hazırlıq prosesini daha təsirli edir.
Növbəti mərhələdə əmək bazarı nümayəndələri ilə ADU-nun 4-cü kurs tələbələrinin birgə iştirakı ilə daha geniş müzakirələrin aparılması planlaşdırılır. Görüşlərin əsas məqsədi tələbələrin əmək bazarına daha yüksək hazırlıqla daxil olmasına dəstək göstərmək və onların karyera inkişafına töhfə verməkdir.