Noyabrın 26-da Azərbaycan Dillər Universitetində (ADU) Türk Dünyası Araşdırmaları Mərkəzinin təşkilatçılığı ilə “Kaşğarlı Mahmud Yolu və Türk Dünyası” adlı dəyirmi masa keçirilib. Tədbirdə universitetin professor-müəllim heyəti və tələbələr iştirak ediblər.
Giriş sözü ilə çıxış edən Türk Dünyası Araşdırmaları Mərkəzinin müdiri Cəlal İbrahimli Kaşğarlı Mahmudun türk dilinin qorunması və inkişafında oynadığı vacib roldan danışıb. O bildirib ki, Kaşğarlı Mahmud türk coğrafiyalarını dolaşaraq müxtəlif ləhcə və ağız xüsusiyyətlərini toplamış, bunları Divanü Lügati’t-Türk əsərində bir araya gətirmişdir. Əsər yalnız sözlərdən ibarət olmayıb, həm də türk tayfalarının tarixi, mədəniyyəti, folkloru və həyat tərzi barədə qiymətli məlumatlar verir.
“Tehsil365” bildirir ki, ADU-nun Elmi işlər üzrə prorektoru, professor Həmidə Əliyeva Kaşğarlı Mahmudun dilçilik sahəsindəki xidmətlərini sadə və aydın şəkildə şərh edib. O vurğulayıb ki, Kaşğarlı Mahmudun ləhcələri toplaması və onları müqayisəli şəkildə təsnif etməsi türk dilçiliyinin əsasını təşkil edir və əsər bu gün də aktualdır.
Azərbaycan dilçiliyi kafedrasının professoru Adil Babayev isə Divanü Lügati’t-Türkdəki sözlərin mənşəyi, tarixi inkişafı və türk dilləri arasındakı əlaqələr barədə danışıb. O qeyd edib ki, Kaşğarlı Mahmudun araşdırmaları türk dillərinin tarixini öyrənmək üçün dəyərli və etibarlı bir mənbədir.
Tələbələr də müzakirələrdə fəal iştirak edərək türk dillərinin qorunması, ortaq mədəni irsin saxlanması və Kaşğarlı Mahmudun irsinin müasir dövrdə rolu ilə bağlı suallar veriblər.