2018-ci il noyabrın 27-də Azərbaycanda xəbər yayımında yeni mərhələnin təməli qoyuldu — ARB Media Qrupun təşəbbüsü ilə “ARB 24” xəbər kanalı təsis olundu.
“Tehsil365” xəbər verir ki, Kanal 24 saat ərzində yerli və beynəlxalq xəbərləri operativ şəkildə tamaşaçılara çatdırmağı hədəfləyərək ölkənin ilk ixtisaslaşmış xəbər platformalarından biri oldu.
ARB 24-ün yaradılması Azərbaycanın media məkanında informasiya sahəsinin daha da inkişaf etdirilməsinə xidmət etdi. Kanalın əsas məqsədi cəmiyyətə obyektiv, balanslı və vaxtında informasiya təqdim etmək, həmçinin iqtisadiyyat, siyasət, sosial həyat, texnologiya və beynəlxalq hadisələrə dair dərin təhlillərlə ictimai rəyin formalaşmasına töhfə verməkdir.
Yayım həyatına başladığı gündən ARB 24 daim dinamikliyi, aktual reportajları və müxtəlif analitik proqramları ilə seçilib. Xəbər blokları ilə yanaşı, iqtisadi icmallar, ekspert şərhləri və canlı bağlantılar kanalı digər televiziya platformalarından fərqləndirib.
Bu gün, təsisindən 6 il sonra, ARB 24 ölkənin aparıcı xəbər kanallarından biri olaraq fəaliyyətini davam etdirir və media mühitində özünəməxsus yerini qoruyur. Kanalın fəaliyyəti informasiya müharibələrinin intensivləşdiyi dövrdə maarifləndirici və informativ funksiyanın əhəmiyyətini bir daha göstərir.