Bu gün görkəmli Azərbaycan və Rusiya şərqşünası, türkoloq, tarixçi və filoloq Mirzə Kazım bəyin vəfatının ildönümüdür.
“Tehsil365” xəbər verir ki, O, 27 noyabr (9 dekabr) 1870-ci ildə Sankt-Peterburq şəhərində vəfat edib.
1802-ci ildə İranın Rəşt şəhərində anadan olan Mirzə Kazım bəy XIX əsr Şərq elminin öncül simalarından biri olmuşdur. O, elmi fəaliyyətinə Rusiyada başlamış, Kazan Universitetində müəllim kimi fəaliyyət göstərmiş və burada ilk dəfə ərəb, fars və türk dillərinin dərsliyini tərtib etmişdir. Onun 1839-cu ildə yazdığı “Türk-Tatar dillərinin ümumi qrammatikası” əsəri Avropa türkologiyasının əsasını qoyan fundamental işlərdən hesab olunur.
Mirzə Kazım bəyin elmi fəaliyyəti təkcə türk dilləri ilə məhdudlaşmayıb, o, İslam tarixi, ərəb-fars ədəbiyyatı, müqayisəli dilçilik və Şərq fəlsəfəsi sahələrində də dəyərli araşdırmalar aparıb. Onun əsərləri yalnız Rusiyada deyil, Avropanın bir çox ölkələrində maraqla qarşılanmış, Fransa, Almaniya və İngiltərə elmi dairələrində geniş yayılmışdır.
Mirzə Kazım bəy həm də Rusiya Elmlər Akademiyasının müxbir üzvü olmuş, Sankt-Peterburqda Şərq dilləri fakültəsinin dekanı vəzifəsində çalışmışdır. Onun adı Azərbaycan elminin beynəlxalq səviyyədə tanınmasında mühüm rol oynamışdır.
Mirzə Kazım bəyin vəfatının ildönümündə onun zəngin elmi irsi xatırlanır, Şərqşünaslıq və türkologiya sahələrindəki əvəzsiz xidmətləri ehtiramla yad olunur. Onun adı bu gün də Azərbaycan elminin tarixinə qızıl hərflərlə yazılmışdır.