“Sözün yaddaşı var. Deyirlər ki, bir xalqın ruhu ilk növbədə onun dilində yaşayır. Müasir dövrdə məlumat axını sürətlənsə də, ana dilinə sevgi və diqqət onun ən möhkəm sipəridir. Azərbaycan dilinin saflığını qorumağın əsas yolu isə dilə hörmət və məsuliyyətli yanaşmanın formalaşdırılmasından keçir. Normativ qaydaların təbliği, düzgün yazı və danışıq nümunələrinin artırılması, peşəkar redaktə mədəniyyətinin gücləndirilməsi dilin qorunması baxımından mühüm əhəmiyyət daşıyır”.
“Tehsil365“ “AZƏRTAC”a istunadla bildrib:
AZƏRTAC-a açıqlamasında yazıçı-publisist Vəsimə İsmayılqızı deyib. Onun sözlərinə görə, dilimizin tarixi və mədəni kontekstdə qorunması yalnız ədəbi nümunələrin yaşadılması ilə məhdudlaşmır. Bu, həm də dilin düşüncə tərzimizi formalaşdıran, milli yaddaşı nəsildən-nəsilə ötürən bir sistem kimi davamlı şəkildə işlək saxlanmasını tələb edir. Klassik ədəbiyyatın daha geniş təbliği gənclərə dilin poetik, fəlsəfi və dərin qatlarını tanıdır, dilin estetik gücünü ortaya çıxarır və ana dilinə bağlılığı artırır.
Vəsimə İsmayılqızı hesab edir ki, terminoloji vahidliyin yaradılması da dilin gələcəyi üçün mühüm şərtdir. Müasir dövrdə elm, texnologiya və ictimai həyat sürətlə dəyişdiyindən yeni anlayışların, terminlərin Azərbaycan dilinə uyğun şəkildə gətirilməsi və vahid standartların formalaşdırılması həm elmi mühitdə, həm də mediada düzgün ifadə mədəniyyətini gücləndirir.
O, həmçinin vurğulayıb ki, Azərbaycan dilinin elmi-mədəni mühitdə daha fəal yaşadılması dilin inkişaf prosesini təbii yolla sürətləndirir. Akademik məqalələrdən tutmuş teatr tamaşalarına, sərgilərdən müzakirə platformalarına qədər hər bir sahədə dilin səlis, zəngin və norma çərçivəsində işlənməsi gələcək nəsillər üçün sağlam dil mühiti yaradır.
“Dil milli yaddaşın əsas daşıyıcısıdır və həmin yaddaşın qorunması ayrı-ayrı təşəbbüslərlə deyil, düşünülmüş və uzunmüddətli strateji yanaşma ilə mümkündür. Bu strategiya isə təhsil, media, həm də mədəniyyət mühitinin birgə fəaliyyəti ilə reallaşa bilər”, - deyə V. İsmayılqızı əlavə edib.