Azərbaycan Dillər Universitetinin (ADU) baş müəllimləri Elvira İmanova və Nərgiz Mədətova Venesuela Bolivar Respublikasının paytaxtı Karakasda keçirilən II Beynəlxalq Poeziya Festivalında iştirak ediblər.
“Tehsil365” xəbər verir ki, festival çərçivəsində Venesuela poeziyasının görkəmli nümayəndələrinin Azərbaycan dilinə tərcümə olunmuş üç kitabının təqdimat mərasimi də keçirilib. Bu kitablar ADU ilə Venesuelanın Azərbaycandakı səfirliyinin əməkdaşlığı çərçivəsində ispan dilindən Azərbaycan dilinə tərcümə edilib.
Təqdimat mərasimində Venesuela Bolivar Respublikası Milli Assambleyasının Sədri Xorxe Rodrigez, hökumət rəsmiləri və Venesuelanın kommunikasiya və informasiya naziri, tanınmış şair Freddi Nyanyez iştirak ediblər. Freddi Nyanyez festivalın təşkilatçı heyətinin əsas simalarından biri kimi çıxış edib.
Mərasim Azərbaycan Respublikasının tanıtım çarxının nümayişi ilə açılıb. Ardınca ADU-nun fəaliyyəti, tələbələrin tərcümə prosesi və universitetin beynəlxalq əməkdaşlıq istiqamətləri barədə məlumat verilib və videoçarx nümayiş olunub. Tədbir iştirakçılarına universitetin strukturu və fəaliyyətini əks etdirən broşürlər təqdim edilib.
Təqdimatın yekununda tərcümə olunmuş kitabların müəllifləri şeirlərini ispan dilində, ADU-nun baş müəllimi Elvira İmanova isə həmin nümunələrin Azərbaycan dilində tərcümələrini səsləndiriblər.
Festival günləri ərzində ADU-nun müəllimləri Venesuelanın müxtəlif yerli media qurumlarına müsahibələr verərək, layihənin iki ölkə arasında mədəni-humanitar əlaqələrin möhkəmlənməsinə töhfə verəcəyini vurğulayıblar.
Təqdimat mərasimi Venesuelanın dövlət televiziya kanalında canlı yayımlanıb.