Bu gün 28 noyabr 1989-cu ildə SSRİ Ali Sovetinin qəbul etdiyi qərarla Dağlıq Qarabağ Muxtar Vilayətində (DQMV) idarəetmə strukturlarında mühüm dəyişiklik edilmişdi.
"Tehsil365" xəbər verir ki, “Dağlıq Qarabağ Muxtar Vilayətində vəziyyətin normallaşdırılması tədbirləri haqqında” sənədə əsasən, 1989-cu ilin yanvarından fəaliyyət göstərən Xüsusi İdarə Komitəsinin səlahiyyətlərinə son verildi və onun yerinə Respublika Təşkilat Komitəsi yaradıldı.
Yeni komitənin rəhbəri vəzifəsinə Azərbaycan Kommunist Partiyası Mərkəzi Komitəsinin 2-ci katibi Viktor Polyaniçko təyin edildi. Formal olaraq Azərbaycanın tabeliyində göstərilsə də, bu qurum da Moskvanın birbaşa nəzarəti altında fəaliyyət göstərirdi. Bu addım mərkəzi sovet hakimiyyətinin Qarabağ üzərindəki təsirini gücləndirmək cəhdi kimi qiymətləndirildi.
Komitənin yaradılması Azərbaycanın suverenlik haqlarını daha da zəiflətmiş, bölgədəki gərginliyi azaltmaq əvəzinə ictimai narazılığı daha da artırmışdı. Xalq arasında bu qərar Azərbaycanın ərazi bütövlüyünün pozulması kimi dəyərləndirildi və ciddi etirazlara səbəb oldu.
Hadisələr göstərdi ki, Moskvanın təzyiqi ilə həyata keçirilən bu tip inzibati dəyişikliklər Dağlıq Qarabağ münaqişəsinin həllinə yox, əksinə, onun daha da dərinləşməsinə səbəb oldu. Tarixi sənədlər və dövrün şahidlərinin sözləri bu qərarın Azərbaycan üçün növbəti bir ədalətsizlik mərhələsi olduğunu təsdiqləyir.
Bu gün həmin qərarın qəbul edilməsinin 36 ili tamam olur. Azərbaycanın ərazi bütövlüyü uğrunda mübarizədə bu kimi tarixi mərhələlər yaddaşımızda dərs kimi qalır.