28 noyabr 1578-ci ildə Ağsu çayı sahilində, Mollahəsən kəndi yaxınlığında tarixi əhəmiyyətə malik döyüş baş verib.
"Tehsil365" xəbər verir ki, Səfəvi dövləti ilə Osmanlı imperiyasının müttəfiqi olan Krım xanı Adil Gərayın rəhbərlik etdiyi qoşunlar arasında baş tutan bu toqquşma Səfəvilərin parlaq qələbəsi ilə nəticələnib.
Səfəvi ordusu döyüşdə Krım qoşunlarını məğlub etməyi bacarıb. Krım xanı Adil Gəray döyüş zamanı yaralanaraq əsir götürülüb. Onun tabeliyində olan qoşun hissələri isə məğlubiyyətdən sonra Osmanlının nəzarətində olan Dərbənd şəhərinə geri çəkilməyə məcbur qalıb.
Lakin bu uğur Səfəvilər üçün uzunmüddətli üstünlük qazandırmadı. Döyüşdən sonra başlayan ardıcıl hərbi əməliyyatlar Osmanlı imperiyasının artmaqda olan üstünlüyü ilə davam etdi. Osmanlı ordusu Cənubi Qafqazda mövqelərini gücləndirdi və nəticədə, 1590-cı ildə imzalanan İstanbul sülhü ilə Səfəvilər Şimali Azərbaycanı (o cümlədən, Şirvan və Qarabağ ərazilərini) itirərək Osmanlının müvəqqəti nəzarətinə verməyə məcbur oldular.
Ağsu döyüşü, hərbi və siyasi baxımdan, regionun taleyində mühüm rol oynayan qarşıdurmalardan biri kimi tarixə düşüb. Bu döyüş bir tərəfdən Səfəvilərin hələ də müqavimət gücünü göstərsə də, digər tərəfdən Osmanlı-Səfəvi müharibələrinin davamlı gərginlik və ərazi itkiləri ilə müşayiət olunduğunu nümayiş etdirir.