25-26 noyabr tarixlərində Özbəkistanın paytaxtı Daşkənd şəhərində yerləşən Mərkəzi Asiya Universitetində keçirilən “QS Avrasiya Forumu 2025” tədbiri çərçivəsində Azərbaycan Universitetinə “QS 4 Stars” mükafatı təqdim olunub.
“Tehsil365” xəbər verir ki, universitetin fəaliyyətinin “QS Stars” 4 ulduzla qiymətləndirildiyini təsdiq edən sertifikatı “Quacquarelli Symonds” təşkilatının prezidenti və idarə heyətinin sədri Nunzio Quacquarelli Azərbaycan Universitetinin rektoru Səadət Əliyevaya təqdim edib.
Bu mükafat Azərbaycan Universitetinin tədrisin keyfiyyəti, beynəlmiləlləşmə, tələbə məmnuniyyəti və institusional inkişaf üzrə əldə etdiyi uğurların beynəlxalq səviyyədə tanınmasının göstəricisidir. Universitetin QS Stars qiymətləndirməsində yüksək nəticə əldə etməsi onun fəaliyyətinin beynəlxalq standartlara uyğunluğunu təsdiqləyir, qlobal təhsil məkanında nüfuzunun artmasına və xarici tərəfdaşlarla əməkdaşlıq imkanlarının daha da genişlənməsinə töhfə verir.
“Quacquarelli Symonds” tərəfindən hazırlanan və dünyanın ən nüfuzlu beynəlxalq qiymətləndirmə sistemi olan “QS Stars” universitetlərin fəaliyyətini çoxsaylı meyarlar üzrə qiymətləndirir. Buraya tədqiqat fəaliyyəti, tədrisin keyfiyyəti, infrastruktur, müxtəliflik, bərabərlik və inklüzivlik, beynəlmiləlləşmə, məzunların məşğulluğu, qlobal iştirak və bu kimi meyarlar daxildir. QS beynəlxalq qiymətləndirmə sistemi universitetlərin güclü tərəflərini obyektiv şəkildə göstərməklə, beynəlxalq mühitdə rəqabət qabiliyyətini artırır və onların qlobal səviyyədə tanınmasına töhfə verir.
Qeyd edək ki, Azərbaycan Universitetinin rektoru Səadət Əliyevanın rəhbərlik etdiyi nümayəndə heyəti “QS Avrasiya Forumu 2025”də iştirak edib. Rektor Səadət Əliyeva forum çərçivəsində təşkil olunan “Sərhədləri aşan qadınlar: Avrasiya ali təhsilində yenilik yaradanlar” (Breaking barriers: Women shaping Eurasian higher education) adlı panel müzakirəsində çıxış edib.