Azərbaycan Dillər Universiteti Elmi Kitabxana və İnformasiya Xidməti Mərkəzi və Mülki müdafiə və tibbi biliklərin əsasları kafedrasının birgə təşkilatçılığı ilə müəllim heyəti üçün elmi informasiya resurslarına dair dəyirmi masa keçirilib.
“Tehsil365” bildirir ki, tədbirdə ilkin olaraq Elmi Kitabxana və İnformasiya Xidməti Mərkəzinin direktoru Cəmilə Əliyeva çıxış edərək müasir dövrdə elektron informasiya mənbələrinin tədris və elmi fəaliyyət üçün əhəmiyyətindən danışıb. O, KOHA AKS haqqında geniş məlumat verərək e-kataloqdan istifadə üsulları, axtarış mexanizmləri, elektron kitab fondu, mövcud ədəbiyyatın rəqəmsal formada əldə edilməsi, müəllim və tələbələrin elektron resurslara çıxış imkanları barədə ətraflı izahlar təqdim edib.
Cəmilə Əliyeva həmçinin Elmi Kitabxana və İnformasiya Xidməti Mərkəzinin strukturu, xidmət sahələri, istifadəçilərə göstərilən DSpace İnstitutional Repositary (İR) rəqəmsal kitabxana, tematik informasiya xidməti və digər funksiyalar barədə də geniş izah verib. O, elmi axtarış platformalarının ADU-nun tədris və elmi-tədqiqat mühitinə inteqrasiyasının əhəmiyyətini vurğulayaraq bu istiqamətdə aparılan yeniliklər barədə danışıb.
Bununla yanaşı, Tədqiqat Dəstəyi xidmətinin müəllim və doktorantlara elmi məqalə yazılışı, strukturlaşdırma, düzgün istinad sistemi və beynəlxalq jurnallara göndəriş prosesində göstərdiyi metodik dəstək barədə də məlumat verilib.
Tədbir çərçivəsində müəllim-tədqiqatçıların ən çox istifadə etdiyi beynəlxalq elmi məlumat bazaları haqqında da ətraflı təqdimat olunub. Cəmilə Əliyeva EBSCOhost platformasının çoxprofilli axtarış imkanları, geniş elmi jurnal bazası, PDF formatında əlçatan məqalələri və akademik tədqiqat üçün üstünlükləri barədə geniş məlumat verib.
Eyni zamanda, ProQuest bazasının dissertasiyalar, elmi jurnallar və analitik araşdırmalar üzrə zəngin məzmununun tədqiqatçılar üçün böyük dəyər daşıdığı qeyd olunub.
Scopus haqqında danışarkən o, bu platformanın sitat indeksləşdirmə funksiyalarını, müəllimlərin elmi fəaliyyətinin qiymətləndirilməsində oynadığı rolu, impakt faktor, H-indeksi və digər elmi göstəricilərlə bağlı əhəmiyyətini iştirakçıların diqqətinə çatdırıb.
Tədbirin növbəti hissəsində Elmi Kitabxana və İnformasiya Xidməti Mərkəzinin əməkdaşı Elşən Hüseynli çıxış edərək JOVE (Journal of Visualized Experiments) elmi axtarış platforması haqqında geniş təqdimatla çıxış edib.
O, JOVE-un dünyada yeganə video-formatlı elmi məqalələr platforması olduğunu, burada müxtəlif sahələr üzrə – tibb, biologiya, biotexnologiya, kimya, fizika, mühəndislik və psixologiya sahələrində – minlərlə eksperimental prosesin vizual şəkildə nümayiş etdirildiyini vurğulayıb.
Elşən Hüseynli platformanın akademik mühitdə yaratdığı üstünlükləri geniş şəkildə açıqlayıb. O bildirib ki, JOVE-un video-eksperimentləri tələbələrin və müəllimlərin mürəkkəb laboratoriya proseslərini daha tez dərk etməsinə kömək edir, praktiki bacarıqların artırılmasına real töhfə verir və elmi metodların vizual izahı tədris yükünü xeyli yüngülləşdirir.
O, həmçinin JOVE-un axtarış sisteminin strukturundan, fənlər üzrə bölmələrindən, dərsliklər fondundan, laboratoriya protokollarından və müəllimlər üçün nəzərdə tutulan tədris paketlərindən danışıb. Platformanın istifadə qaydalarını, ADU-da bu resursa çıxış imkanlarını, video-məqalələrin istinad sistemini və dərslərdə praktik tətbiq nümunələrini də iştirakçılara ətraflı şəkildə izah edib.
Çıxışlar dinləyici müəllimlər tərəfindən maraqla qarşılanıb və tədbir sual-cavab sessiyası ilə davam edib.