Şəhid Əliağa Məmmədov Eldəniz oğlu 26 iyul 2001-ci ildə Bakının Sabunçu rayonunun Bakıxanov qəsəbəsində anadan olub.
"Tehsil365" xəbər verir ki, o, 2008-ci ildə Azərbaycanın Milli Qəhrəmanı Nazim İsmayılov adına 80 nömrəli tam orta məktəbin 1-ci sinfinə qəbul edilib, daha sonra orta təhsilini Maştağada yerləşən 255 nömrəli məktəbdə davam etdirib.
Əliağa 2017-ci ildə 5 nömrəli Bakı Rəssamlıq Məktəbində “işıq operatoru” ixtisasına yiyələnib və təhsilini başa vurduqdan sonra Azərbaycan Dövlət Akademik Musiqili Dram Teatrında işıq operatoru kimi fəaliyyətə başlamışdır.
2019-cu il iyulun 26-da hərbi xidmətə yollanan qəhrəmanımız 703 nömrəli hərbi hissədə xidmət edib. O, 2020-ci il sentyabrın 27-də başlayan Vətən müharibəsi zamanı Ağdərə istiqamətində gedən döyüşlərdə igidlik göstərib və 2020-ci il oktyabrın 6-da Ağdərənin azad olunması uğrunda gedən döyüşdə şəhidlik zirvəsinə ucalıb. Şəhid Maştağa qəsəbəsindəki Seyidlər qəbiristanlığında dəfn olunub.
Əliağa Məmmədov ölümündən sonra Prezident İlham Əliyevin sərəncamları ilə “Vətən uğrunda”, “Cəsur döyüşçü” və “Suqovuşanın azad olunmasına görə” medalları ilə təltif edilib.
"Tehsil365" İnformasiya Agentliyinin layihəsi olan "Şəhidin səsi" proqramının bu günkü buraxılışı məhz şəhid Əliağa Məmmədova həsr olunub. Buraxılışın aparıcısı müxbir Fatimə Quliyevadır və veriliş bu gün saat 18:00-da yayımlanacaq.
Allah rəhmət eləsin!