Bəxtiyar Vahabzadənin 100 illik yubileyinə həsr olunmuş ədəbi-bədii gecə keçirilib

Azərbaycan Dillər Universitetinin (ADU) İngilis və fransız dilləri fakültəsi nəzdində fəaliyyət göstərən İngilis dilinin qrammatikası kafedrasının müəllimləri – baş müəllim Leyla Süleymanova, müəllimlər Səbinə Vəliyeva və Turanə Qurbanova Xalq şairi Bəxtiyar Vahabzadənin anadan olmasının 100 illik yubileyinə həsr olunmuş “Ürəyim Vətən Deyir” adlı ədəbi-bədii gecə təşkil ediblər. Tədbir 28 noyabr 2025-ci il tarixində Oxu zalında baş tutub.

“Tehsil365” bildirir ki, ədəbi-bədii gecədə kafedranın professor-müəllim heyəti, həmçinin fakültənin bütün kurs tələbələri geniş tərkibdə iştirak ediblər. Tədbirin məqsədi Azərbaycanın ədəbiyyat və mədəniyyət tarixində xüsusi yeri olan Bəxtiyar Vahabzadənin həyat və yaradıcılığını tələbələrə daha yaxından tanıtmaq olub.

Tədbirin açılışında İngilis dilinin qrammatikası kafedrasının müdiri, professor Leyla Xanbutayeva çıxış edərək bu kimi tədbirlərin gənc nəslin vətənpərvərlik ruhunda tərbiyəsində mühüm rol oynadığını diqqətə çatdırıb.

Gecəyə İngilis və fransız dilləri fakültəsinin dekanı dosent Vəfa Babayeva, dekan müavini və kafedranın müəllimləri də qatılıblar. Vəfa Babayeva tədbirin gənclərin milli-mənəvi dəyərlərə bağlılığının gücləndirilməsinə xidmət etdiyini vurğulayıb.

Daha sonra İngilis dilinin qrammatikası kafedrasının baş müəllimi Arzu Səlimova şairin yaradıcılığı haqqında məruzə ilə çıxış edib.

Tədbir çərçivəsində Bəxtiyar Vahabzadənin poeziyasından seçilmiş şeirlər səsləndirilib, bədii kompozisiyalar nümayiş olunub, eləcə də şairin həyat və yaradıcılığı, vətənpərvərlik, azadlıq və milli dəyərlər mövzulu əsərlərinin ideya-məzmun xüsusiyyətlərinə dair ingilis dilində slayd təqdimatları göstərilib. Tələbələr şairin müxtəlif dövrlərə aid şeirlərini Azərbaycan və ingilis dillərində ifa edərək həm dil bacarıqlarını, həm də Bəxtiyar Vahabzadə irsinə olan ehtiramlarını nümayiş etdiriblər.

Bununla yanaşı, “Gülüstan” poeması tələbələr tərəfindən səhnələşdirilib, şairin sözlərinə yazılmış “Azərbaycan” mahnısı ifa olunub.

Tədbirin sonunda tələbələrə sertifikatlar təqdim edilib.