Dekabrın 1-də Azərbaycan Dillər Universitetində (ADU) “Narkotiklər və QİÇS: Gənclər və Sağlam Cəmiyyət” mövzusunda maarifləndirici dəyirmi masa keçirilib. Tədbirin əsas məqsədi gənclər arasında narkotik vasitələrin zərərləri və QİÇS (HIV) infeksiyasından qorunma yolları barədə ictimai maarifləndirməni gücləndirmək, risk faktorları haqqında məlumatlılığı artırmaq, sosial məsuliyyət və təhlükəsiz davranış mədəniyyətini təşviq etmək olub.
“Tehsil365” bildirir ki, tədbir Azərbaycan Dillər Universitetinin Tərcümə fakültəsinin dekanı, professor Bənövşə Məmmədovanın açılış nitqi ilə başlayıb. O, gənclərin sağlam gələcəyinin cəmiyyət üçün prioritet olduğunu vurğulayaraq bu kimi maarifləndirici təşəbbüslərin davamlı keçirilməsinin vacibliyini qeyd edib.
Daha sonra “Narkotiklər və QİÇS: Hüquq və Sağlamlıq Perspektivi” mövzusunda panel müzakirələri aparılıb.
Panel çərçivəsində:
Vasif Quliyev – Azərbaycan Respublikası Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupunun məsul əməkdaşı “Narkotiklərlə mübarizə və dövlət siyasəti” mövzusunda çıxış edib və 802 qaynar xətti barədə ətraflı məlumat verib.
Yelmar Vahabov – Daxili İşlər Nazirliyinin Baş Narkotiklərlə Mübarizə İdarəsinin əməkdaşı, polis mayoru, təhqiqatçı “Hüquqi müdafiə və preventiv tədbirlər” mövzusunda məruzə təqdim edib.
Fidan Ataxanlı – Bakı Şəhər Narkoloji Mərkəzinin həkim-narkoloqu “Narkotik istifadəçilərində sağlamlıq riskləri, QİÇS və digər infeksiyalardan qorunma yolları” barədə geniş tibbi maarifləndirmə aparıb.
Tədbirdə həmçinin Azərbaycan Dillər Universitetinin İngilis və Fransız dilləri fakültəsinin dekan müavini Zülqəddə Abdulkərimli çıxış edərək tədbirin əhəmiyyətini vurğulamış və təşkilatçılara, qonaqlara, iştirakçılara təşəkkürünü bildirib.
Paneldən sonra iştirakçıların sualları cavablandırılıb, aktual mövzular ətrafında müzakirələr aparılıb. Tədbir çərçivəsində mövzuya uyğun maarifləndirici sosial videoçarx nümayiş etdirilib.
Keçirilən dəyirmi masa gənclərin sağlam həyat tərzinə təşviq edilməsi, narkomaniya və QİÇS-ə qarşı mübarizədə ictimai fəallığın artırılması baxımından mühüm əhəmiyyət kəsb edir.