Dekabın 1-də Azərbaycan Dillər Universitetində (ADU) İsrailin Azərbaycandakı fövqəladə və səlahiyyətli səfiri cənab Ronen Krauzsun iştirakı ilə “Ərəb ölkələrində yəhudi icmaları” mövzusunda mühazirə təşkil olunub. Tədbirdə İsrail və Yaxın Şərq Araşdırmalar Mərkəzinin əməkdaşları, ADU-nun müəllim heyəti və tələbələr iştirak ediblər.
“Tehsil365” bildirir ki, mühazirənin əsas məqsədi ərəb ölkələrində yaşayan yəhudi icmalarının tarixi, onların uzun əsrlər boyu formalaşmış mədəni həyatı və XX əsrdə baş vermiş köç və məcburi yerdəyişmə proseslərini tələbələrə təqdim etmək idi.
Cənab Krauzs yəhudi icmalarının ərəb ölkələrində sosial, iqtisadi və mədəni rolunu, eləcə də yerli xalqlarla qarşılıqlı əlaqələrini ətraflı şəkildə təqdim edib. O, XX əsrin ortalarında Yaxın Şərqdə baş verən siyasi dəyişikliklərin və gərginliyin yəhudi icmalarının həyatına ciddi təsir göstərdiyini vurğulayıb. Təqib, hüquqi məhdudiyyətlər, zorakılıq və mülkiyyət itkisi səbəbindən bir çox icmaların yaşayış yerlərini tərk etməyə məcbur qaldığını, nəticədə milyonlarla insanın müxtəlif ölkələrə, o cümlədən İsrailə sığınmalı olduğunu bildirib.
Səfir həmçinin köç edən icmaların yeni cəmiyyətlərə inteqrasiya prosesindən və mədəni irsin qorunması istiqamətində aparılan işlərdən danışıb.
Mühazirənin sonunda tələbələrin regionun tarixi, müasir İsrail–ərəb münasibətləri və mədəni müxtəlifliyin qorunması mövzularına aid sualları cavablandırılıb. Tədbir interaktiv, elmi və maarifləndirici xarakter daşıyıb.
Ümumilikdə, mühazirə tələbələrin Yaxın Şərq tarixini, region xalqlarının mədəni müxtəlifliyini və sosial prosesləri daha dərindən öyrənməsinə imkan yaradıb və onların bilik və dünyagörüşünün inkişafına töhfə verib.