Layihənin əsas məqsədi gənc fotoqraflara, tələbələrə fotoqrafiya üzrə bilik və bacarıqlar aşılamaq, onları bu istiqamətdə dəstəkləmək, gələcəkdə peşəkar fotoqraf kimi yetişmələri üçün həm şərait yaratmaq, həm də onlara yol göstərməkdir.
“Tehsil365” bildirir ki, bu sözləri AZƏRTAC-a açıqlamasında “Gilavar Foto Klubu” İctimai Birliyinin İdarə Heyətinin sədri Rəşad Mehdiyev deyib.
Onun sözlərinə görə, layihə gənc fotoqrafların peşəkar inkişafına xidmət edən uzunmüddətli və sistemli bir proqram kimi nəzərdə tutulub: “Bu layihə bir neçə dəfə müxtəlif qrant müsabiqələrinə təqdim olunsa da, hər dəfə müsabiqədən keçmirdi. Amma sonuncu müraciətimizdə gözləmədiyimiz halda layihə qalib gəldi və bizə etimad göstərildi. Məhz bu etimadın nəticəsində 7 aylıq bir layihə həyata keçirdik, onun 5 ayı təlim kurslarına həsr olundu. Təlim müddətində iştirakçılara həm nəzəri, həm praktiki biliklər verildi”.
Rəşad Mehdiyev bildirib ki, bu layihə bu qədər geniş miqyasda və uzunmüddətli formatda ölkədə, demək olar ki, ilk dəfə həyata keçirilir: “Hazırda digər fotoqrafiya kursları əsasən bir ay, ayyarım, maksimum iki ay davam edir. Bizim proqramda isə təlim prosesi təxminən beş ay çəkdi”.
O qeyd edib ki, dərslər peşəkar fotoqraflar tərəfindən aparılıb: “Təlimlər Azərbaycan fotoqrafiyasının qocaman fotoqrafı “Gilavar Foto Klubu” İctimai Birliyinin İdarə Heyətinin üzvü Rauf Umudov, eləcə də Azərbaycan Dövlət İnformasiya Agentliyinin (AZƏRTAC) fotomüxbiri Tofiq Babayev tərəfindən tədris olunub”.
O vurğulayıb ki, layihənin məqsədi gənc fotoqrafların gələcəkdə həm ölkə daxilində, həm də beynəlxalq arenada Azərbaycanı peşəkar səviyyədə təmsil edə bilməsinə təkan verməkdir.