Azərbaycan Memarlıq və İnşaat Universitetinin (AzMİU) Strateji planlaşdırma şöbəsinin müdiri Qənirə Məmmədzadə, Elmi tədqiqat şöbəsinin müdiri Reyhan Əkbərli Özbəkistanın Daşkənd şəhərində keçirilən Birinci QS Avrasiya Forumunda iştirak ediblər.
“Tehsil365” bildirir ki, Mərkəzi Asiya Universitetində baş tutan forum qlobal reytinq agentliyi Quacquarelli Symonds (QS) tərəfindən təşkil olunub. Tədbirin açılış paneli Avrasiya ali təhsil məkanının Şərqlə Qərb arasında körpü roluna və regionun inkişaf dinamikasına həsr olunub.
Paneldə Azərbaycan təcrübəsi təqdim edilib, ölkədə ali təhsilin beynəlmiləlləşməsi, elmi-tədqiqat fəaliyyətinin gücləndirilməsi, eləcə də regional əməkdaşlıq imkanları müzakirə olunub.
Açılış sessiyasında çıxış edən elm və təhsil naziri Emin Əmrullayev, Elm və Ali Təhsil üzrə Dövlət Agentliyinin direktoru Ülkər Səttarova Azərbaycanda ali təhsil sahəsində aparılan islahatlar, beynəlxalq inteqrasiya, eləcə də ali məktəblərin qlobal rəqabət qabiliyyətinin artırılması istiqamətində görülən işlər barədə məlumat veriblər.
Bundan başqa, paneldə Birləşmiş Ərəb Əmirliklərinin Ajman Universiteti, Qazaxıstanın Əl-Fərabi adına Qazax Milli Universiteti və Qırğızıstanın Oş Dövlət Universitetinin rəhbərləri öz təcrübələrini bölüşüblər.
Forum çərçivəsində keçirilən tədbirlərdə AzMİU nümayəndə heyəti QS-in regionda ali təhsilin keyfiyyətinin yüksəldilməsi, beynəlxalq tələbə axınının artırılması, xarici filialların cəlb olunması və universitetlərin qlobal rəqabətliliyinin gücləndirilməsi üzrə yanaşmaları ilə bağlı müzakirələrdə iştirak ediblər.
Məlumat üçün bildirək ki, Avrasiya regionunun QS Dünya Universitet Reytinqində iştirakı əhəmiyyətli dərəcədə artıb. Belə ki, son dörd ildə reytinqdə yer alan ali təhsil müəssisələrinin sayı 48-dən 71-ə yüksəlib. Forum iştirakçıları bu dinamikanın növbəti illərdə də davam edəcəyini vurğulayıblar.
Qeyd edək ki, AzMİU nümayəndə heyətinin tədbirdə iştirakı regionun ali təhsil sisteminə inteqrasiyasının genişlənməsi, beynəlxalq əməkdaşlıq imkanlarının artırılması və universitetin qlobal akademik mühitdə daha fəal mövqe qazanması baxımından əhəmiyyət daşıyır.