Tanınmış yazıçı Amid Səlimoğlu ilə son əsəri "Sən axı kimsən?!" haqqında söhbətləşdik. Müəllifdən ilham mənbəyi, əsərin janrı, başlığın seçimi və povestin əsas mesajı barədə suallarımıza cavab aldıq.
“Tehsil365” xəbər verir ki, Amid Səlimoğlu bildirdi ki, "Qaranlıqdan işığa" və "Kimsəsiz" kimi iri həcmli romanlardan sonra daha yığcam, lakin təsirli əsərlər yazmağa qərar verib. "Sən axı kimsən?!" əsərini də bu niyyətlə və ani qərarla qələmə aldığını deyir. “Bir aya yazıb bitirdim, çap yox, sadəcə kitab saytlarında paylaşmaq niyyətində idim. Çox ciddi yanaşmasam da, hekayənin sonunda gözlənilməz hadisə ilə oxucunu təəccübləndirməyə çalışdım,” – deyə müəllif bildirir.
Əsərin real hadisəyə əsaslanıb-əsaslanmadığı sualına isə Səlimoğlu belə cavab verdi: “Yolda gedərkən ağac kölgəsini insana bənzədib qorxduğum bir an var idi. Məhz bu xatirədən ilhamlanaraq sonluqda həmin elementi işlədim.”
Povestin adının sual formasında və vurğulu verilməsi də müəllifin düşünülmüş seçimidir. O, bu yolla oxucunun marağını oyatmağa və əsərin sonunda verilən mesajla əlaqə qurmağa çalışıb.
Əsərin verdiyi əsas mesaj isə budur: insanları tanımadan mühakimə etməmək. Müəllif oxucunu zahiri görünüşə aldanmamağa və hər kəsin arxasında fərqli bir hekayə olduğunu anlamağa təşviq edir.
Yazıçının sözlərinə görə, povestin ikinci hissəsi də artıq yazılıb və davamı da gözlənilir.