Azərbaycan Dillər Universitetində (ADU) “Suveren Azərbaycan: Gənclər və Konstitusiyanın rolu” adlı dəyirmi masa keçirilib.
“Tehsil365” bildirir ki, dəyirmi masa İngilis-alman dili fakültəsi nəzdində Leksikologiyası kafedrasının baş müəllimi, fil.f.d. Gülşən Məhərrəmova tərəfindən təşkil olunub. Tədbirdə İngilis-fransız dili fakültəsinin 318B qrup tələbələri iştirak edib. Açılış Azərbaycan Respublikasının himni ilə olub. Tədbirdə İngilis dilinin Leksikologiyası kafedrasının müdiri fil.f.d. dos. Mehriban Hüseynova, EKİXM-nin direktoru Cəmilə Əliyeva və Oxu zalının müdiri Güllüzar Məmmədova da iştirak ediblər.
Tələbələr çıxışlarında vurğulayıblar ki, gənc nəsil üçün Konstitusiya və suverenlik böyük əhəmiyyət kəsb edir, onların hüquqlarını və vəzifələrini anlamalarına kömək edir. Suveren ölkədə yaşamağın məsuliyyətini öyrənən gənclər həm öz hüquqlarını müdafiə edə, həm də ölkənin inkişafına töhfə verə bilərlər.
Eyni zamanda tələbələr qeyd ediblər ki, Azərbaycan Respublikasının suverenliyi və Konstitusiya prinsiplərinin möhkəmləndirilməsində Prezident İlham Əliyevin mühüm rolu vardır. Onlar bildiriblər ki, onun rəhbərliyi altında hüquqi islahatlar həyata keçirilir, dövlət institutlarının fəaliyyətinin səmərəliliyi artırılır və Konstitusiya ilə müəyyən edilmiş hüquq və azadlıqlar qorunur. Tədbir çərçivəsində mövzu ilə bağlı silsilə slaydlar nümayiş etdirilib.
Daha sonra çıxış edən fil.f.d. dos. Mehriban Hüseynova, EKİXM-nin direktoru Cəmilə Əliyeva və Oxu zalının müdiri Güllüzar Məmmədova qeyd ediblər ki, Konstitusiya və suverenlik gənclər üçün həm də milli kimlik və vətənpərvərlik mənbəyidir. Hüquqi biliyə yiyələnən gənclər gələcəkdə dövlət işlərində və qərar qəbul edilməsində daha fəal iştirak edə bilərlər. Qonaqlar tədbirin təşkilatçısı fil.f.d. Gülşən Məhərrəmovaya və 318B qrup tələbələrinə təşəkkürlərini bildiriblər və tələbələrin bu mövzuda ingilis dilində sərbəst müzakirə aparmasını yüksək qiymətləndiriblər.
Qeyd edək ki, tədbir məqsədi gənclər üçün Konstitusiyanın və suverenliyin əhəmiyyətini vurğulamaq olub.
Azərbaycan Respublikasının Konstitusiyası ölkəmizin hüquqi təməlidir və dövlətimizin müstəqil, suveren olmasını təmin edir. 1995-ci ildə qəbul edilən bu əsas qanun vətəndaşların hüquq və azadlıqlarını qoruyur. Suverenlik isə Azərbaycanın siyasi, iqtisadi və hüquqi müstəqilliyini ifadə edir.