Azərbaycan Dillər Universitetinin (ADU) İnklüziv Təhsil Mərkəzi tərəfindən tələbələr üçün “Erqoterapiyanın mahiyyəti və tətbiq sahələri” mövzusunda maarifləndirici tədbir keçirilib. Tədbirin məqsədi tələbələrdə erqoterapiya haqqında məlumatlılığı artırmaq, bu sahənin inklüziv təhsildə rolunu izah etmək və gələcək mütəxəssislərdə praktiki baxış formalaşdırmaq olub.
“Tehsil365” bildirir ki, tədbirdə İnklüziv Təhsil Mərkəzinin müdiri, dosent Nigar Zeynalova çıxış edərək erqoterapiyanın əsas istiqamətləri – gündəlik həyat vərdişlərinin inkişafı, kiçik və böyük motorikanın dəstəklənməsi, sensor inteqrasiya, davranışın tənzimlənməsi, eləcə də xüsusi təhsil ehtiyacı olan uşaqlarla işin xüsusiyyətləri barədə ətraflı təqdimatla məlumat verib.
Görüş zamanı iştirakçılara erqoterapevtin fəaliyyəti, inklüziv mühitdə erqoterapiyanın əhəmiyyəti və tətbiq olunan metodlarla bağlı praktiki nümunələr təqdim olunub. Eyni zamanda tələbələrin sualları cavablandırılıb və xüsusi qayğıya ehtiyacı olan uşaqlarla işləyən mütəxəssislərin qarşılaşdığı çətinliklər və onların həlli yolları müzakirə edilib.
Tədbirin sonunda iştirakçılar belə maarifləndirici görüşlərin onların peşəkar inkişafı üçün əhəmiyyətli olduğunu vurğulayıb və İnklüziv Təhsil Mərkəzinə təşəkkürlərini ifadə ediblər.