Azərbaycan Dillər Universiteti (ADU) və iTTi Baku – ABŞ Beynəlxalq TEFL Təlim İnstitutunun Azərbaycandakı rəsmi nümayəndəliyinin birgə təşkilatçılığı ilə “Qrammatikadan Kənar: ESL sinfində müassir metodologiyaların tətbiqi” adlı Beynəlxalq Konfrans keçirilib. Tədbir iki formatda —əyani və onlayn baş tutub və bu istiqamətdə əsas tərəfdaşlıq missiyasını ANT Education Center yerinə yetirib.
“Tehsil365” bildirir ki, konfransda Azərbaycandan başqa Niderland, Yunanıstan, Türkiyə, Qazaxıstan, Özbəkistan, BƏƏ (Dubai), Nigeriya, Rusiya, Ukrayna, Çin, Qırğızıstan və digər ölkələrdən müəllimlər və təhsil mütəxəssisləri iştirak edib.
ADU-nun Beynəlxalq Əlaqələr üzrə prorektoru professor, PhD Jalə Qəribova açılış nitqi ilə çıxış edərək qonaqları salamlayıb və tədbirin əhəmiyyətini vurğulayıb. Daha sonra iTTi Baku-nun CEO-su və iTTi New York-un Azərbaycan üzrə rəhbəri Afər İbrahimov çıxış edərək universitet rəhbərliyinə və Beynəlxalq Departamentə əməkdaşlığa görə təşəkkürünü bildirib. ANT Education Center-in rəhbəri Günel Mənsimli də konfransın təşkilində göstərilən dəstəyə görə minnətdarlığını ifadə edib.
Bu il konfrans dünyanın müxtəlif ölkələrindən gələn tanınmış təhsil liderlərini bir araya gətirib və onların təcrübə mübadiləsi aparmasına imkan yaradıb. Tədbirdə iTTi Baku-nun qurucusu Afər İbrahimov, iLearn Tavros-un Akademik Direktoru Evangelia (Evi) Karydi, sosial-emosional rifah üzrə ekspert Theodora Bogiou, ESBL-in qurucusu PhD Mehdi Zargari, ANT Education Center-in rəhbəri Günel Mənsimli, IB MYP & DP kurikulumu üzrə müəllim Nick Nwolisa, yaradıcı incəsənət və drama üzrə tədris rəhbəri Jacqueline Ketting və International TEFL Training Institute-in qurucusu Tacito Cury çıxış ediblər.
Konfrans yeni tədris metodlarının, süni intellekt vasitələrinin tətbiqi, yaradıcı yanaşmaların və sosial-emosional rifahın müzakirə olunduğu ən genişmiqyaslı ESL tədbirlərindən biri kimi tarixə keçib. iTTi Baku və Azərbaycan Dillər Universitetinin əməkdaşlığı nəticəsində keçirilən konfrans ölkədə müəllim hazırlığı sahəsində yeni standartların müəyyənləşməsinə töhfə verib.