Azərbaycan Dillər Universitetinin (ADU) Linqvokulturologiya kafedrasının müdiri, dosent Vüsalə Ağabəylinin təşəbbüsü və baş müəllim Səidə Orucovanın təşkilatçılığı ilə “Hər Qız Məktəbə” mövzusunda dəyirmi masa keçirilib.
“Tehsil365” bildirir ki, görüşdə kafedranın müəllimləri, universitetin kitabxana əməkdaşları və 104a qrupunun tələbələri iştirak ediblər.
Tədbirin məqsədi qızların təhsil imkanlarının əhəmiyyətini vurğulamaq, onların maarifləndirilməsinə diqqəti artırmaq və müasir cəmiyyətdə qadınların roluna dair fikir mübadiləsi aparmaq olub.
Baş müəllim Səbinə Orucova mövzu ilə bağlı təqdimatla çıxış edərək dünya təcrübəsindən nümunələr təqdim edib, qızların təhsilə cəlb olunmasının qlobal miqyasda prioritet istiqamətlərdən biri olduğunu vurğulayıb. O, təhsil sahəsində gender bərabərliyinin təmin edilməsinin mühüm sosial məsələ olduğunu diqqətə çatdırıb.
Tədbir çərçivəsində qızların təhsil almasının vacibliyinə həsr olunmuş maarifləndirici videoçarx nümayiş etdirilib. Videoçarx iştirakçılar tərəfindən maraqla qarşılanıb və qadınların təhsilə çıxış imkanlarının artırılmasının əhəmiyyətini bir daha ön plana çıxarıb.
Dəyirmi masada universitetin kitabxana əməkdaşları da çıxış edərək müasir informasiya mühitində bilik əldə etmə yolları, qızların maarifləndirilməsində kitabxanaların rolu və mövcud imkanlar barədə məlumat veriblər.
Diskussiya tələbələrin fəal iştirakı ilə davam edib. İştirakçılar qızların təhsili ilə bağlı aktual məsələlər, mövcud problemlər və onların həlli yolları barədə suallar səsləndirərək fikir mübadiləsi aparıblar.