Azərbaycan Memarlıq və İnşaat Universiteti Tələbə Gənclər Təşkilatının (AzMİU TGT) təşkilatçılığı ilə həyata keçirilən “50 il – 50 ekskursiya” layihəsi çərçivəsində tələbələrimiz ölkənin ən mühüm dövlət orqanlarından biri olan Azərbaycan Respublikasının Ali Məhkəməsinə ekskursiya ediblər.
“Tehsil365” bildirir ki, ekskursiyanın məqsədi tələbələrin məhkəmə-hüquq sistemi, məhkəmələrin iş prinsipləri, qərarların qəbul edilmə mexanizmləri və Ali Məhkəmənin fəaliyyəti barədə daha dolğun, praktiki məlumat əldə etməkdir.
Ekskursiya zamanı tələbələr Cinayət Kollegiyasının iclas zalı, məhkəmə prosesi keçirilən zal, Plenum zalı, həmçinin Ali Məhkəmənin konfrans zalı ilə tanış olublar. Gənclərə bu məkanların funksiyası, istifadə qaydaları, proseslərin aparılma forması və iş mexanizmi ətraflı şəkildə izah edilib. Ekskursiya çərçivəsində tələbələr kitabxana və Ali Məhkəmə Muzeyini ziyarət edərək məhkəmə sisteminin tarixi inkişafı, hüquq sahəsində aparılan islahatlar, eləcə də müasir məhkəmə strukturlarının formalaşması haqqında geniş məlumat əldə ediblər.
Tələbələr Azərbaycanın Ali Məhkəməsinin İnzibati Kollegiyasının hakimi Sərvər Vəliyevlə görüşüb, məhkəmə sistemi barədə daha dərindən məlumatlanıblar. Hakim tələbələrə inzibati mübahisələrin mahiyyəti, işlərin məhkəmələrə təqdim olunma mexanizmi, prosesin mərhələləri və inzibati işlər üzrə qərarların hansı hüquqi meyarlarla qəbul edildiyini geniş izah edib, məhkəmə proseslərinin şəffaflığı, tərəflərin bərabərliyi, vətəndaş–dövlət münasibətlərində hüquqi balansın qorunması, real məhkəmə işlərindən nümunələr əsasında qərarvermə mexanizmləri barədə danışaraq tələbələrin suallarını ətraflı cavablandırıb. Bu görüş tələbələr üçün həm nəzəri, həm praktiki baxımdan olduqca faydalı təcrübə olub və onların məhkəmə-hüquq sisteminə dair təsəvvürlərini daha da genişləndirib.
Ekskursiya interaktiv müzakirələrlə, tələbələrin ünvanladıqları sualların cavablandırılması ilə davam edib və Ali Məhkəmənin fəaliyyəti ilə yaxından tanış olmaq baxımından layihənin ən yaddaqalan məqamlarından biri kimi yadda qalıb.