Azərbaycan Memarlıq və İnşaat Universitetinin (AzMİU) Mexanika kafedrasında Azərbaycan Respublikası Seysmoloji Xidmət Mərkəzi ilə əməkdaşlıq çərçivəsində universitetin 50 illik yubileyinə həsr olunmuş “Seysmologiya və zəlzələyə davamlı tikinti” mövzusunda elmi seminar təşkil edilib.
“Tehsil365” bildirir ki, seminarda Mexanika kafedrasının müdiri, dosent Ceyhun Musayev çıxış edərək zəlzələyədavamlı tikinti sahəsində aparılan elmi işlərin mühəndislik təhsilində xüsusi yer tutduğunu bildirib və bu istiqamətdə əməkdaşlığın davamlılığının vacibliyini qeyd edib. O, seminarın tələbələr üçün praktik biliklərin artırılması baxımından böyük imkan yaratdığını da diqqətə çatdırıb.
Seminarın məruzəçisi Seysmoloji Xidmət Mərkəzinin şöbə müdiri, AzMİU Mexanika kafedrasının müəllimi, dosent Etibar Qaravəliyev regionun seysmik fəallığı, zəlzələ risklərinin qiymətləndirilməsi, mühəndis konstruksiyalarının dayanıqlılığının artırılması və müasir hesablama metodları barədə ətraflı məlumat verib, zəlzələyədavamlı tikinti standartlarının beynəlxalq təcrübə fonunda təhlilini təqdim edərək bu sahədə aparılan elmi tədqiqatların praktiki əhəmiyyətindən danışıb.
Seminarda müəllim və tələbələr seysmoloji müşahidələrin aparılması, zəlzələ zamanı tikililərin davranış mexanizmləri, konstruksiyaların optimallaşdırılması, eləcə də yeni materialların tətbiqi kimi məsələlərlə bağlı suallar ünvanlayıb, fikir mübadiləsi aparıblar.
Sözügedən seminarı universitetin elm, tədris və tətbiqi tədqiqatlar sahəsində əməkdaşlıq əlaqələrinin gücləndirilməsi, tələbələrin real elmi-praktik proseslərə cəlb edilməsi istiqamətində atılan mühüm addımlardan biri kimi dəyərləndirmək mümkündür.
Onu da qeyd edək ki, u kimi tədbirlər mühəndis kadrlarının hazırlığında zəlzələyədavamlı tikinti kimi həyati əhəmiyyətli sahələr üzrə bilik və bacarıqların artırılmasına əlverişli imkan yaradır.
Tədbirin keçirilməsində əsas məqsəd müasir seysmologiya sahəsində son elmi yenilikləri, zəlzələyədavamlı tikinti prinsiplərini tələbə və mütəxəssislərə çatdırmaq, bu istiqamətdə nəzəri biliklərlə yanaşı, praktiki yanaşmaları müzakirə etməkdir.