Bu gün Azərbaycanın qadın güləş tarixində xüsusi yeri olan Mariya Vasili qızı Stadnikin doğum günüdür.
"Tehsil365" xəbər verir ki, O, 3 dekabr 1988-ci ildə Ukraynanın Lvov şəhərində anadan olub.
Stadnik 2007-ci ildən etibarən Azərbaycan yığmasının heyətində çıxış etməyə başlayıb və 2025-ci ildə karyerasını sonlandırana qədər dünya arenasında ölkəmizi layiqincə təmsil edib. O, Azərbaycanın idman tarixində ən titullu qadın güləşçisi kimi tanınır.
Dörd Olimpiya Oyunlarında iştirak etmiş Mariya Stadnik bu yarışlarda üç gümüş və bir bürünc medal qazanaraq dünya qadın güləşində nadir uğura imza atıb. O, həmçinin dünya və Avropa çempionatlarında dəfələrlə qızıl medal əldə edərək adını idman tariximizə qızıl hərflərlə yazdırıb.
Mariya Stadnikin nizam-intizamı, əzmkarlığı və peşəkarlığı onu təkcə idmançı kimi deyil, həm də nümunəvi bir şəxsiyyət kimi gənclərə örnək edib. Onun güləş karyerası həm Azərbaycan idmanına, həm də qadın idmanının inkişafına böyük töhfə verib.