3 dekabr – Azərbaycanın tanınmış uzunömürlüsü, talışəsilli Mahmud Bağır oğlu Eyvazovun vəfat etdiyi gündür.
"Tehsil365" xəbər verir ki, O, 1808-ci il fevralın 7-də Lerik rayonunun Pirəsora kəndində dünyaya gəlmiş, ömrünün sonuna qədər də orada yaşamışdır.
Mahmud Eyvazovun həyat yolu onun qeyri-adi uzunömürlülüyü ilə yadda qalıb. 152 il ömür sürdüyü deyilən Eyvazov bu xüsusiyyəti ilə təkcə Azərbaycanda deyil, dünyada da maraq doğurmuşdu. Onun sağlam həyat tərzi, təbiətlə iç-içə yaşamı və sadə qidalanma vərdişləri bu uzunömürlülüyün əsas səbəblərindən biri kimi göstərilir.
Pirəsora kəndində sadə bir kəndli həyatı yaşayan Eyvazovun ömrü boyu fiziki fəaliyyətlə məşğul olması, təmiz hava və təbii qidalarla bəslənməsi uzunömürlülüyün vacib amilləri hesab olunur.
Mahmud Eyvazovun həyatı Azərbaycanın təbii-coğrafi şəraitinin və xalqın yaşam tərzinin uzunömürlülükdə rolunu göstərən nümunələrdəndir. O, 1960-cı il dekabrın 3-də vəfat etmişdir. Onun xatirəsi hələ də Lerikdə və uzunömürlülüyü ilə tanınan bölgələrdə ehtiramla yad olunur.