Azərbaycanlı müəllif Bəsti Yusifova ilə onun yeni əsəri “Səssiz Sevda” barədə maraqlı reportaj etdik.
“Tehsil365” xəbər verir ki, Gərginlik və duyğularla dolu bu hekayənin əsas qəhrəmanı danışma əngəlli bir qız – Nuraydır.
Bəsti Yusifova bildirib ki, “Səssiz Sevda”nı yazmaq qərarını uzun müddətdir daşıyırmış:
“Həmişə həyəcanlı, aksiyonlu kitabları sevmişəm. Və öz dilimizdə belə bir əsər yazmağı çox istəyirdim” – deyə o qeyd edir.
Əsərdəki baş qəhrəman Nurayın danışma əngəlli olması yazı prosesini müəllif üçün daha da çətin və maraqlı edib:
“Danışa bilməyən bir obrazın duyğularını çatdırmaq mənim üçün çətin idi, amma bu qızı elə yazmaq istədim” – deyir Yusifova.
Əsərin əsas xətti isə qəhrəmanın bir gecə təsadüfən şahid olduğu hadisə ilə başlayır. Bundan sonra isə adi bir eşq hekayəsi təhlükə, gerilim və sirrlə dolu bir kabusa çevrilir.
“Səssiz Sevda”nın əsas mesajlarından biri isə müəllifin fikrincə belədir:
“Susqunluq bəzən ən böyük səsdir. Nuray danışa bilməsə də, onun gördükləri və yaşadıqları böyük anlam daşıyır”.
Müəllif oxuculara həyatı fərqli prizmadan görməyi, danışmaq və duyğuları ifadə etməyin dəyərini anlamağı aşılayır.
Əsərin davamı ilə bağlı sualımıza isə o belə cavab verir:
“Bu yalnız bir kitab olacaq. Amma nəşr etdirib çap etmək ən böyük arzumdur”.
“Səssiz Sevda” susqun bir qızın içində qopan fırtınaları hiss etdirmək istəyən səmimi və düşündürücü əsərdir.