Dekabrın 3-də Azərbaycan Dillər Universitetinin Tərcümə fakültəsində kafedranın 2025–2026-cı tədris ili üçün təsdiqlənmiş tədbirlər planına uyğun olaraq “1 dekabr – QİÇS-lə mübarizə günü”nə həsr olunmuş “Məlumatlan, qorun, dəstək ol” adlı dəyirmi masa keçirilib.
“Tehsil365” bildirir ki, tədbir kafedranın baş müəllimi Aygün Kərimovanın təşkilatçılığı ilə fakültənin III kurs 355–359-cu qrup tələbələrinin iştirakı ilə olub. Dəyirmi masada kafedra müdiri, dosent Sevda Zamanova və baş müəllim Nahidə Məmmədova iştirak ediblər.
Tədbir dövlət himninin səsləndirilməsi ilə başlayıb. Daha sonra tələbələr – Aidə Bayramova, Aysu İsmayılova, Lena Eminli, Fatimə Salmanlı və Sənan Əsgərov HİV infeksiyası, onun yayılma yolları, QİÇS sindromunun əlamətləri, dünya və ölkəmizdə xəstəlik statistikasına dair məlumatlar, eləcə də həyata keçirilən müalicəvi-profilaktik tədbirlər və maarifləndirmə istiqamətləri barədə təqdimatlarla çıxış ediblər.
Tədbir çərçivəsində bir neçə maarifləndirici videoçarx nümayiş etdirilib.
Sonda dosent S. Zamanova və baş müəllim N. Məmmədova ölkəmizdə dövlət tərəfindən həyata keçirilən profilaktik tədbirlərin, həmçinin bu kateqoriyadan olan xəstələrə göstərilən diqqət və qayğının əhəmiyyətini vurğulayıblar. Onlar qadınlar və qızlar arasında maarifləndirmə işlərinin xüsusi önəm daşıdığını qeyd edərək, tədbirin təşkilinə görə Aygün Kərimovaya və fəal iştiraklarına görə tələbələrə təşəkkür ediblər.