2 dekabr tarixində Azərbaycan Dillər Universitetinin (ADU) İngilis və alman dilləri fakültəsi nəzdində fəaliyyət göstərən Alman dilinin leksikologiyası və üslubiyyatı kafedrasının dosenti Gülənbər Pirnəzərovanın təşəbbüsü və təşkilatçılığı ilə Xüsusi İnternat məktəbində xarici dil müəllimlərinə “Xarici dilin tədrisində interaktiv təlim metodlarının tətbiqi” adlı təlim keçirilib.
“Tehsil365” bildirir ki, təlim zamanı Gülənbər Pirnəzərova interaktiv təlim metodları və onların xarici dil dərslərində tətbiqi barədə məlumat verib, müəllimlərlə fikir mübadiləsi aparıb. Təlim iştirakçıları və məktəbin Gənclər Təşkilatının sədri Xoşqədəm Əhmədova maraqlı və faydalı təlimə, eləcə də məktəblə əməkdaşlığa görə dosent Gülənbər Pirnəzərovaya təşəkkür ediblər. Sonda iştirakçılara sertifikatlar təqdim olunub.
Gülənbər Pirnəzərova 1–5 fevral 2011-ci ildə Bakı Pedaqoji Kadrların İxtisasartırma və Yenidənhazırlanma İnstitutunda “511329-TEMPUS-1-AZ-TEMPUS-JPCR” layihəsi çərçivəsində keçirilən təlimdə, 2014-cü ildə Almaniyada alman dilinin tədrisi metodikasına həsr olunmuş iki həftəlik seminarda, həmçinin bir çox respublika və beynəlxalq səviyyəli təlimlərdə iştirak edib.
ADU-nun əməkdaşı öz təcrübəsini görmə məhdudiyyəti olan müəllimlərlə bölüşməkdən məmnun olduğunu bildirib.