Bu gün XIX əsr Azərbaycan rəssamlığının görkəmli nümayəndəsi Mirzə Qədim İrəvaninin xatirəsi yad edilir.
"Tehsil365" xəbər verir ki, Təxminən 1825-ci ildə İrəvanda anadan olan sənətkar, Azərbaycan portret sənətinin və panel rəssamlığının əsasını qoyan şəxs kimi tarixə düşüb.
Mirzə Qədim İrəvani portret janrının inkişafında mühüm rol oynamış, xüsusilə insan obrazlarının realist təsviri və zəngin bədii üslubu ilə seçilmişdir. O, həm də ornamentalist olaraq müxtəlif dekorativ sənət nümunələrində ustalığını nümayiş etdirmişdir.
Rəssamın yaradıcılığı Azərbaycan təsviri sənətinin yeni dövrə keçidini simvolizə edir. O, klassik Şərq miniatür ənənəsini Qərb təsviri sənət prinsipləri ilə birləşdirərək unikal sənət məktəbi formalaşdırmışdır.
1875-ci ildə vəfat edən Mirzə Qədim İrəvani, bu gün də Azərbaycan mədəni irsinin dəyərli simalarından biri kimi yaddaşlarda yaşayır. Onun əsərləri həm sənətşünaslar, həm də sənətsevərlər tərəfindən böyük maraqla qarşılanır.