2026-cı ildən peşə təhsilinin bütün səviyyələrində kredit sisteminin tətbiqi təklif olunur. Burada söhbət maliyyə vəsaiti şəklində olan tələbə kreditindən yox, tədris prosesində qazandırılan akademik kreditlərdən gedir.
“Tehsil365” xəbər verir ki, bu barədə Peşə Təhsili üzrə Dövlət Agentliyinin Peşə təhsili sektorunun aparıcı məsləhətçisi Rəbiyyə Museyibzadə məlumat verib. Onun sözlərinə görə, bu sistem Avropa təcrübəsinə əsaslanır və artıq Azərbaycanda da tətbiq olunur. Məqsəd təhsilin çevikliyini artırmaq və peşə təhsili alanların bilik və bacarıqlarını daha dəqiq qiymətləndirməkdir.
R.Museyibzadə əlavə edib ki, peşə təhsili sektorunda adambaşı maliyyələşmə sistemi tətbiq olunur. Adambaşı maliyyələşmə sistemi peşə təhsili müəssisələrinin maddi-texniki bazasını gücləndirməyə, yeni laboratoriyalar yaratmağa və təmir-tikinti işlərini həyata keçirməyə şərait yaradır. Hazırda peşə təhsili sistemində işəgötürənlərin və təhsil müəssisələrinin öhdəliklərini, təhsilverən və təhsilalanların əməyinin ödənilməsi qaydalarını müəyyən edən sənədlərin təkmilləşdirilməsi istiqamətində işlər aparılır. Həmçinin keyfiyyətin ölçülməsi üzrə yeni mexanizmlər hazırlanır, təhsilalanların və təhsilverənlərin etik davranış kodeksi üzərində işlər davam etdirilir.
Agentliyin rəsmisi vurğulayıb ki, sistemin daha da genişləndirilməsi, əhatə dairəsinin artırılması və müəssisələrin sayının çoxaldılması planlaşdırılır. Yeni mexanizm tətbiq ediləndə müəssisələrdə əməyin ödənişinin stimullaşdırılması həyata keçiriləcək. Bu isə işçi heyətinin maddi təminatının yüksəlməsinə, onların işə daha yüksək motivasiya ilə yanaşmasına və peşə təhsili müəssisələrinə daha ixtisaslı mütəxəssislərin cəlb olunmasına imkan yaradacaq.