“Akademik Yusif Məmmədəliyevin elmi irsi təkcə Azərbaycan üçün deyil, ümumən bəşəriyyət üçün mühüm əhəmiyyət daşıyır”.
“Tehsil365” xəbər verir ki, bu fikirləri bu gün Azərbaycan Milli Elmlər Akademiyasının Rəyasət Heyətində akademik Yusif Məmmədəliyevin 120 illiyinə həsr olunmuş beynəlxalq konfransda İSESKO-nun baş direktoru Salim bin Məhəmməd əl-Maliki səsləndirib.
O,çıxışında qeyd edib ki, Məmmədəliyevin parlaq nailiyyətləri insanlığın Yer kürəsindən kənara atdığı ilk böyük addımların təməlində dayanan elmi sıçrayışlara ciddi töhfə verib.
Baş direktor bildirib ki, bu gün Azərbaycan neft-kimya innovasiyalarının aparıcı mərkəzlərindən birinə çevrilibsə, bunun əsas səbəblərindən biri də Məmmədəliyevin yaratdığı elmi məktəblər və institutlardır. Bu qurumlar bu gün də alimlərin fəaliyyətində araşdırma ruhunu yaşadır, yeni nəsil tədqiqatçıların yetişməsi üçün bilik məbədi kimi xidmət edir.
Salim bin Məhəmməd əl-Maliki vurğulayıb ki, akademik Məmmədəliyev yalnız görkəmli bir kimyaçı deyil, həm də elm və mədəniyyətin vəhdətinə böyük önəm verən müdrik maarifçi olub. O, elmi milli kimlik və irslə qovuşduraraq Azərbaycan dili, ədəbiyyatı, əlyazmaları və tarixi yaddaşının qorunmasına xüsusi diqqət ayırıb.
Baş direktorun sözlərinə görə, Yusif Məmmədəliyevin yaratdığı bu irs elm və mədəniyyət arasında harmoniyanın xalqların tərəqqisi üçün əsas şərt olduğunu sübut edir.