Dünyanın artan əhalisini və enerji keçidini dəstəkləmək üçün tələb olunan mineral yataqları tapmaq uğrunda yarış davam edir. Süni intellekt texnologiyasından kəşfiyyat və hasilat üçün istifadə edənlər artıq liderlik edirlər.
“Tehsil365“ “AZƏRTAC”a istinadla xəbər verir ki, bu barədə Azərbaycan Dövlət Neft və Sənaye Universitetinin “Faydalı qazıntı yataqlarının geologiyası və işlənməsi” kafedrasının müəllimi, texniki elmlər üzrə fəlsəfə doktoru Azər Şükürovun "Süni intellektin dağ-mədən sənayesinə tətbiqi: reallıqlar və perspektivlər" mövzusunda məqaləsində bəhs olunub.
Bildirilib ki, süni intellekt mineral yataqlarını müəyyən etmək və əməliyyat proseslərini dəqiq optimallaşdırmaq üçün qabaqcıl alqoritmlərdən istifadə etməklə kəşfiyyat və hasilatın dəqiqliyinin artırılmasını dəstəkləyir. Tədqiqatlar, torpaq tərkibi və tarixi hasilat qeydləri kimi geniş geoloji məlumatları təhlil etməklə süni intellekt alqoritmləri mineral yataqlarının yerini dəqiq proqnozlaşdırmağa, lazımsız qazma və qazıntı işlərinin azaldılmasına kömək edə bilər. Real vaxt rejimində həmin alqoritmlər dəyişən geoloji şəraiti qiymətləndirir və hasilat texnikalarını müvafiq olaraq tənzimləyir, resursların səmərəli şəkildə çıxarılmasını, tullantıların minimuma endirilməsini və məhsuldarlığın maksimum dərəcədə artırılmasını təmin edir. Həmin dəqiqlik torpağa dəyən zərərləri minimuma endirir və ətrafdakı ekosistemləri qoruyur.
"Respublikamızda bu sahənin inkişafı faydalı qazıntıların potensialının həcmi və keyfiyyətinin, bu potensialın kommersiya dayanıqlılığının, gələcəkdə faydalı qazıntı istehsalına dair gözləntilərin və onun iqtisadi səmərəliliyinin analizini tələb edir. Bu isə ölkəmizin faydalı qazıntıların əsas ehtiyatlarının təhlil edilməsi, zaman daxilində potensial yatırımın qiymətləndirilməsi siyasətini daha yaxşı məlumatlandıra, strateji investisiyalara gətirib çıxara bilər ki, bu da öz növbəsində sahənin daha da yenilənməsinə və inkişafına yol açar", - deyə məqalədə qeyd olunub.