Dekabrın 3-də Azərbaycan Dillər Universitetində Xalq şairi, görkəmli ədəbiyyat xadimi Bəxtiyar Vahabzadənin anadan olmasının 100 illiyinə həsr olunmuş “Ədəbi irsimizin böyük siması – Bəxtiyar Vahabzadə” adlı ədəbi-bədii tədbir keçirilib.
“Tehsil365” bildirir ki, tədbir, Azərbaycan Respublikasının Prezidenti cənab İlham Əliyevin 21 fevral 2025-ci il tarixli “Bəxtiyar Vahabzadənin 100 illik yubileyinin qeyd edilməsi haqqında” Sərəncamına əsasən həyata keçirilib və şairin zəngin ədəbi irsinin gənc nəslə daha geniş şəkildə tanıdılması məqsədini daşıyıb.
Açılış nitqi ilə çıxış edən Azərbaycan Dillər Universitetinin İngilis–Fransız Dilləri fakültəsinin dekan müavini Zülqəddə Abdulkərimli Bəxtiyar Vahabzadənin Azərbaycan ədəbiyyatında, milli düşüncə tarixində və ictimai şüurda tutduğu əvəzsiz roldan danışıb.
Bakı Dövlət Universitetinin dosenti Etibar Talıblı Bəxtiyar Vahabzadənin həm elmi rəhbəri, həm də müəllimi olduğunu bildirərək böyük şairlə bağlı səmimi xatirələrini bölüşüb. Etibar Talıblı Vahabzadəni yalnız qüdrətli şair deyil, həm də yüksək mənəviyyat sahibi, vətəninə dərin bağlılığı ilə seçilən prinsipial və dürüst ziyalı kimi xarakterizə edib. Onun sözlərinə görə, Bəxtiyar Vahabzadə tələbələrinə qarşı həm qayğıkeş, həm də tələbkar olub, gənclərin formalaşmasında mühüm rol oynayıb, onlara elm, Vətən sevgisi və mənəvi dəyərləri aşılamağı özünə borc bilib. O vurğulayıb ki, şairin şəxsiyyəti və yaradıcılığı bir-birini tamamlayır və bu gün də cəmiyyət üçün mənəvi yol göstərici rolunu oynayır.
Tədbirin bədii hissəsində İngilis və Fransız dilləri fakültəsinin II, III və IV kurs tələbələri — Zəhra Əliyeva, Səbihə Hüseynəliyeva, Mələk Muradova, Leyla Poladova, Xədicə Alışova, İşıqlan Əhmədova, Səyyarə Məlikova, Nabat Fərzəliyeva, Fatimə Sadıqzadə, Mədinə Bayramova və Almazın Məlikova — şairin Şamil Zaman tərəfindən fransız dilinə tərcümə edilmiş “Mumiya”, “Bakı vaxtı ilə”, “Yazı masamın arxasında” və “Ağ saçlar” şeirlərini səsləndiriblər.
Tədbirdə Fransız dilinin leksikologiyası və üslubiyyatı kafedrasının baş müəllimləri Kəmalə Kərimova, Rəfiqə Mürşüdova və Əzizə Məmmədova da çıxış edərək Bəxtiyar Vahabzadənin yaradıcılığı, şəxsiyyəti və Azərbaycan ədəbiyyatına verdiyi töhfələrdən danışıblar.
Tələbələrlə iş və tədbirlərin təşkili şöbəsinin təşkilatçısı Səadət Nəbiyeva çıxışında bu kimi tədbirlərin gənclərin milli-mənəvi dəyərlər ruhunda formalaşmasına böyük töhfə verdiyini, Bəxtiyar Vahabzadə irsinin gənclər arasında təbliğinin xüsusi əhəmiyyət daşıdığını vurğulayıb.
Tədbir Bəxtiyar Vahabzadənin sözlərinə bəstələnmiş “Azərbaycan” mahnısının tələbələrin ifasında səsləndirilməsi ilə yekunlaşıb.