Məktəb psixoloqları çoxsaylı şagirdlərlə işləməyə məcbur qalır, lakin lazımi şərait və texniki təminat yoxdur. Otaq, printer və kağız verilməməsi işi çətinləşdirir. Bir psixoloqa 1000-dən çox şagird düşür. Əməkhaqqı az, məsuliyyət isə çoxdur. Nəticədə psixoloji xidmət keyfiyyətini itirir və şagirdlər lazımi dəstəyi ala bilmir.
Mövzu ilə bağlı “Tehsil365” ə psixoloq Sibel Priyeva açıqlama verib. O qeyd edib ki, Azərbaycanda məktəb psixoloqlarının fəaliyyəti bir sıra ciddi problemlərlə üz-üzədir. Psixoloji xidmət məktəblərdə psixokonsultasiya, psixodiaqnostika, psixokorreksiya və psixoprofilaktika istiqamətlərində aparılsa da, mövcud şərait bu xidmətin effektiv həyata keçirilməsinə imkan vermir.
O bildirib ki, son illərdə məktəb psixoloqlarına mərkəzləşdirilmiş fəaliyyət planı verilmədiyi bildirilir. Psixoloqlar öz fəaliyyət planlarını özləri tərtib etməyə məcbur qalır, bu isə əlavə məsuliyyət və vaxt itkisi yaradır. Xüsusilə sentyabr və oktyabr aylarında birinci və beşinci sinif şagirdlərinin adaptasiya dövründə psixoloqların üzərinə əlavə yük düşür.
“Əsas problemlərdən biri məktəblərdə psixoloqlar üçün ayrıca iş otaqlarının olmamasıdır. Bir çox psixoloq sənədləşmə işlərini aparmaq üçün lazımi şəraitlə təmin edilmir. Printer, kompüter və A4 kağızlarının verilməməsi iş prosesini daha da çətinləşdirir. Bəzi hallarda psixoloqlar iş üçün zəruri olan ləvazimatları öz şəxsi vəsaitləri hesabına almağa məcbur qalırlar.”
“Digər problem isə kadr çatışmazlığıdır. Hazırda bir psixoloqun üzərinə 1000-dən artıq şagird düşür ki, bu da fərdi yanaşmanı mümkünsüz edir. Psixoloqlar eyni zamanda testlər keçirməli, valideynlərlə görüşməli, şagirdlərlə fərdi işləməli və korreksiya tədbirləri aparmalıdırlar. Halbuki, bəzi ölkələrdə məktəbdə bu işi bir neçə fərqli mütəxəssis bölüşdürür.”
O qeyd edib ki, mütəxəssislərin sözlərinə görə, problemlərin böyük hissəsi ailə mühitində formalaşır. Aparılan müşahidələr göstərir ki, şagirdlərdə rast gəlinən psixoloji problemlərin təxminən 65 faizi valideynlərdə də mövcuddur. Lakin Azərbaycanda ailə psixoloqları əsasən özəl müəssisələrdə fəaliyyət göstərdiyindən məktəblərlə əməkdaşlıq imkanları məhduddur.
Nəticə olaraq, məktəb psixoloqları hesab edir ki, mövcud problemlər onların savadsızlığı ilə deyil, iş şəraitinin düzgün qurulmaması ilə bağlıdır. Qeyd olunur ki, lazımi şərait təmin olunsa, psixoloji xidmətin səviyyəsi əhəmiyyətli dərəcədə yüksələ bilər və bu, şagirdlərin gələcək həyatında müsbət rol oynayar.