Azərbaycan Dillər Universitetinin rektoru, xalq yazıçısı və akademik Kamal Abdullanın “Kim dedi ki, simurq quşu var imiş” əsəri əsasında hazırlanan “Simurq quşu” tamaşasının premyerası Cəlil Məmmədquluzadə adına Naxçıvan Dövlət Milli Dram Teatrında keçirilib.
“Tehsil365” bildirir ki, tamaşa orijinal quruluşda təqdim olunub və onun səhnə yozumunu quruluşçu rejissor Mir Qabil Əkbərov verib. Quruluşçu rəssam Araz Xudiyev, musiqi tərtibatçısı isə Əfsanə Şirəliyevadır.
Tamaşada Kamal Abdulla yaradıcılığına xas olan postmodern üslub, sətiraltı mənalar, intellektual və emosional eksperimentlər uğurla qorunub saxlanılıb. Rejissorun fəlsəfi yanaşması səhnə şərtilikləri ilə üzvi şəkildə birləşdirilib. İnsan duyğularının incə qatlarına toxunan mətnin səhnə təqdimatında reallıq və sərtlik ahəngi xüsusi vurğulanıb. Aktyorlar insanın daxili ikiləşmə anlarını, hisslərlə intellektual düşüncənin toqquşduğu psixoloji hal və təlatümləri yüksək ustalıqla canlandırıblar.
Tamaşada dramaturqun işarə və şifrələrlə yüklənmiş sətiraltı mənalar da aktyorlar tərəfindən dəqiq duyulub və səhnədə məharətlə təqdim olunub. Rolları canlandıran Naxçıvan Muxtar Respublikasının əməkdar artisti Səməd Canbaxşıyev (Kapitan), Günay Qurbanova (Səs), Əlizamin Abbasov (Ada sahibi), Anar Eyvazov (Nağılçı), Azərbaycan Respublikasının əməkdar artisti Behruz Haxverdiyev (Zabit), Zakir Fətəliyev (Padşah), Şəbnəm Qayıbalıyeva (Gözəl qız), Uğur Nəsirli (Şahzadə), Azərbaycan Respublikasının xalq artisti Şirzad Abutalıbov (Vəzir), Xəlil Hüseynov (Cəllad) və Ələsgər Quliyev (Dev) müəllifin ideyalarını səhnənin pafosu və şərtiliklərinə uyğun şəkildə böyük peşəkarlıqla çatdırıblar.
Tamaşanın səhnə tərtibatı da xüsusi olaraq diqqət çəkib. Müəllifin ideyalarının reallaşdırılması üçün işıq-kölgə effektlərindən peşəkar şəkildə istifadə olunub, səhnənin ümumi plastikasında aktyorların jest və mimikalarının ifadə imkanları uğurla ön plana çıxarılıb. Səs tərtibatı və musiqi müşayiəti də tamaşanın emosional yükünü gücləndirib.
Tamaşanın hazırlanmasında bədii heyətin əməyini xüsusi vurğulamaq lazımdır. Baş rəssam, Əməkdar Mədəniyyət İşçisi Ədilə Səfərova, musiqi hissə müdiri Əfsanə Şirəliyeva, truppa müdiri, Əməkdar artist Vidadi Rəcəbli və quruluş hissə müdiri Dünyamalı Orucov tamaşanın vahid yaradıcı orqanizm kimi formalaşdırılmasına mühüm töhfə veriblər.
Tamaşa böyük anşlaqla qarşılanıb və teatr ictimaiyyəti tərəfindən yüksək qiymətləndirilib. Sonda akademik Kamal Abdulla yaradıcı heyəti təbrik edərək tamaşanı özünün ən dəyərli yubiley hədiyyəsi kimi dəyərləndirib.